मडगाव पालिका बैठकीला सत्ताधाऱ्यांचीच दांडी

मडगाव: गांधी मार्केटमधील दोन दुकानांच्या भाडेपट्टी करारासंदर्भात चर्चा करण्यासाठी सोळा नगरसेवकांनी केलेल्या मागणीवरून बोलावलेली मडगाव पालिकेची खास बैठक कोरम अभावी तहकूब करण्याची वेळ नगराध्यक्षांवर ओढवली.

उपनगराध्यक्षांसह सत्ताधारी गटातील बहुसंख्य नगरसेवक बैठकीस उपस्थित नव्हते व त्यामुळे एक प्रकारे सदर भाडेपट्टीप्रकरणी विरोधी सदस्यांनी केलेल्या आरोपात तथ्य असल्याचा दावा त्यांनी केला. ही बैठक सकाळी 11 वा. बोलावलेली होती व त्या प्रमाणे मुख्याधिकारी आग्नेलो फर्नांडिस वेळेवर सभागृहात उपस्थित झाले.

नगरसेवक घनश्याम शिरोडकर,महेश आमोणकर, सदानंद नाईक,बबीता नाईक, पराडकर, लोटलीकर, कामील बार्रेटो व विरोधी गटाचे अन्य नगरसेवक आले. नंतर काही वेळाने नगराध्यक्ष लिंडन परेराही आले. पण कोरम भरला नसल्याने त्यांनी 20 मिनिटे वाट पाहिली व नंतर कोरम नसल्याचे सांगून त्यांनी बैठक तहकूब केली. यावेळी कामील बार्रेटो व महेश आमोणकर यांनी विषयसूचीवरील एका विषयाबाबत नगराध्यक्षांकडे स्पष्टीकरण मागितले, पण बैठक तहकूब केल्याचे सांगून ते निघून गेले. नंतर त्यांनी तोच मुद्दा मुख्याधिकाऱ्यांकडे उपस्थित केला, पण त्यांनी त्यावर बोलणे टाळले.

नंतर पत्रकारांशी बोलताना कामील बार्रेटो व महेश आमोणकर यांनी बाजार समितीच्या अध्यक्ष असलेल्या उपनगराध्यक्षांसह सदर समितीच्या अन्य सदस्यांनी बैठकीस उपस्थित न रहाणे यावरून या एकंदर प्रकरणात ते सर्व सामील आहेत, हे सिध्द होत असल्याचा आरोप केला. बैठकीची मागणी करणाऱ्या सोळा जणांतील दोघांची नावे नंतर त्या पत्रावरून खोडली गेली आहेत, ती कोणी खोडली, असा मुद्दाही उपस्थित केला गेला व त्यांच्यावर आलेल्या दडपणातून हा प्रकार झाला असावा, असा संशय त्यांनी व्यक्त केला.

भाडेपट्टीसंबंधी संबंधितांनी बैठकीस उपस्थित राहून त्याबाबत स्पष्टीकरण द्यायला हवे होते, असे काही नगरसेवकांनी म्हटले. या प्रकरणी दक्षता खात्याकडे सोपवण्याची मागणी करणार असल्याचे घनश्‍याम शिरोडकर यांनी सांगितले.