Smart City: मोन्सेरात ऑन ग्राऊंड; कामाची केली पाहणी

Smart City गेल्या अनेक दिवसांपासून रखडलेली आणि पणजीकरांना हैराण केलेली स्मार्ट सिटीची कामे लवकर पूर्ण केली जातील, अशी माहिती महापौर रोहित मोन्सेरात यांनी आज दिली. राजधानी पणजीत सांतिनेज परिसरात सुरू असलेल्या स्मार्ट सिटीच्या कामांना आज महापौर रोहित मोन्सेरात यांनी पणजी महापालिकेच्या वरिष्ठ अधिकाऱ्यांसह भेट देऊन पाहणी केली.

प्रामुख्याने जीसुडा, सार्वजनिक बांधकाम खाते, मलनिःसारण यांची जी कामे सुरू आहेत, ती मान्सून सुरू होण्यापूर्वी कशी पूर्ण करता येतील, यावर लक्ष केंद्रित करण्याच्या सूचना संबंधित कंत्राटदारांना दिल्या आहेत.

पणजी शहरातील सांतिनेज भागात मलनिःसारण आणि कचरा व्यवस्थापनाची कामे डोकेदुखीची बनले असून ही कामे वेळेत पूर्ण न झाल्याने सांडपाणी आणि मलनिःसारणाचे पाणी रस्त्यावर येऊन नागरिकांच्या आरोग्याचे प्रश्न निर्माण होणार आहे.

यासाठी हे पाणी एका ठिकाणावरून उचलून ते जलशुद्धीकरण प्रकल्पापर्यंत नेण्याचे काम सध्या सुरू आहे.

सांतिनेज चौकात लिकेज झाल्याने हे काम अर्धवट राहिले होते. ते पुन्हा खोदून या ठिकाणी नवीन पाईप टाकण्याचे काम सुरू आहे. येथील पाणी उचलून करंजाळे परिसरात नेण्यात येणार असून तिथे या पाण्यावर प्रक्रिया करून ते पुन्हा सांतिनेज नाल्यात सोडण्यात येणार आहे.

हे काम गेल्या अनेक दिवसांपासून रखडले असून कॅफे बोरकर ते अग्निशमन केंद्र काकोलो मॉल पर्यंतचे हे काम सध्या तातडीने करण्यासाठीचे प्रयत्न सुरू आहेत.

या सर्व भागांना आज महापौर मोन्सेरात यांनी आपल्या वरिष्ठ अधिकाऱ्यांसह भेट देऊन ही कामे तातडीने कशी करता येतील आणि पणजी शहराला या सांडपाण्यापासून कसे वाचवता येईल, याबाबत चर्चा केली.