म्हापसा: मयडे येथील आत्ताफोंडे पुलाजवळ मंगळवारी पहाटे झालेल्या भीषण हिट-अँड-रन प्रकरणाचा छडा लावण्यात म्हापसा पोलिसांना यश आले आहे. पादचाऱ्याला चिरडून पसार झालेल्या कोंबडी वाहतूक करणाऱ्या वाहनचालकाला पोलिसांनी आज अटक केली. रोहन पाटील (३२, रा. गडहिंग्लज, कोल्हापूर) असे संशयित चालकाचे नाव आहे. या अपघातात आंतोनिओ जॉनी क्वाद्रोस (३५, रा. मयडे) यांचा जागीच मृत्यू झाला होता.
काल मंगळवारी पहाटे चार ते सहाच्या सुमारास आंतोनिओ हे रस्त्यावरून पायी जात असताना बस्तोडा येथून मयडेमार्गे हळदोण्याच्या दिशेने जाणाऱ्या भरधाव वाहनाने त्यांना पाठीमागून जोरदार धडक दिली. ही धडक इतकी भीषण होती की, वाहनाचे चाक त्यांच्या डोक्यावरून गेल्याने त्यांचा जागीच मृत्यू झाला.
अपघातानंतर चालकाने जखमीला मदत न करता किंवा पोलिसांना माहिती न देता वाहनासह घटनास्थळावरून पलायन केले होते. घटनेची माहिती मिळताच म्हापसा पोलिसांनी घटनास्थळी धाव घेत तपास सुरू केला.
हेड कॉन्स्टेबल केशव नाईक यांच्या तक्रारीवरून अज्ञात चालकाविरोधात भारतीय न्याय संहितेच्या २०२३ मधील कलम २८१, १०६ (१) तसेच मोटार वाहन कायद्यातील संबंधित कलमांनुसार गुन्हा नोंदवण्यात आला.
सीसीटीव्ही फुटेज ठरले महत्त्वपूर्ण
परिसरातील सीसीटीव्ही फुटेज आणि तांत्रिक तपासाच्या आधारे वाहनाचा शोध घेण्यात आला. संबंधित वाहन महाराष्ट्र नोंदणीचे असून ते कोंबडी वाहतुकीसाठी वापरले जात असल्याचे तपासात स्पष्ट झाले. त्यानंतर पोलिसांनी तपासाची चक्रे वेगाने फिरवत रोहन पाटील याला अटक केली. या प्रकरणाचा पुढील तपास सुरू आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
