मडगाव: मडगाव शहराच्या वाहतूक नियोजनामध्ये अत्यंत महत्त्वाचा मानला जाणारा 'व्हिक्टर हॉस्पिटल ते ला फ्लोअर' हा उड्डाणपूल आता प्रत्यक्षात उतरण्याच्या दिशेने वेगाने वाटचाल करत आहे. गेली दोन वर्षे हा प्रकल्प थंड बस्त्यात होता, मात्र शनिवारच्या (दि.३) संयुक्त पाहणीने या पुलाच्या उभारणीला नव्याने चैतन्य मिळाले आहे.
रेल्वे अधिकारी आणि सरकारी सल्लागारांनी पुलाच्या नियोजित जागेची पाहणी केली असून, यामुळे मडगाव रिंग रोडचा प्रलंबित टप्पा पूर्ण होण्याचा मार्ग मोकळा झाला आहे. सुमारे ९० कोटी रुपयांच्या या भव्य प्रकल्पासाठी मडगाव रेल्वे रुळांच्या समांतर जागेचा वापर केला जाणार आहे. जुन्या स्थानक परिसरातील रेल्वेच्या मालकीची काही जागा या कामासाठी आवश्यक आहे.
या जागेच्या हस्तांतरणावरून आणि ना-हरकत प्रमाणपत्रावरून (NOC) कामात दिरंगाई होत होती. मात्र, शनिवारी झालेल्या पाहणीत पुलाचे अलाईन्मेंट निश्चित करण्यावर भर देण्यात आला. रेल्वे आणि सार्वजनिक बांधकाम विभागाच्या (PWD) या संयुक्त मोहिमेमुळे आता तांत्रिक अडथळे दूर झाले आहेत.
या प्रकल्पातील अडथळे दूर करण्यासाठी सार्वजनिक बांधकाम मंत्री दिगंबर कामत यांनी नुकताच नवी दिल्लीचा दौरा केला होता. या भेटीदरम्यान त्यांनी केंद्रीय रेल्वे मंत्र्यांशी उड्डाणपुलाच्या विषयावर सविस्तर चर्चा केली.
कामत यांनी दिलेल्या माहितीनुसार, रेल्वे मंत्र्यांनी या प्रकल्पासाठी पूर्ण सहकार्य करण्याचे आश्वासन दिले आहे. "रेल्वेच्या जागेचा प्रश्न आता निकाली निघाला असून, लवकरच निविदा प्रक्रिया सुरू केली जाईल," असे कामत यांनी स्पष्ट केले. या प्रकल्पासाठी 'सेंट्रल रोड अँड इन्फ्रास्ट्रक्चर फंड' (CRIF) मधून निधी मंजूर झाला असून, यापूर्वी जून २०२४ मध्ये माती परीक्षणाचे कामही पूर्ण झाले आहे.
हा उड्डाणपूल केवळ एक पूल नसून मडगावच्या वाहतूक व्यवस्थेचा कणा ठरणार आहे. रिंग रोडचा हा महत्त्वाचा दुवा पूर्ण झाल्यामुळे जुना बाजार परिसर, ओल्ड स्टेशन रोड आणि फायर स्टेशन रोड मार्गे थेट पॉवर हाऊस जंक्शनपर्यंतचा प्रवास विनाअडथळा होईल. मडगावमधील वाढत्या वाहतूक कोंडीतून कायमस्वरूपी सुटका मिळवण्यासाठी हा प्रकल्प मैलाचा दगड ठरेल, असा विश्वास व्यक्त केला जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.