Madgaon Pre-monsoon Cleaning: मडगावात पावसाळापूर्व कामांना सुरूवात; कोंबवाडा प्रभाग झाला चकाचक, 30 मजूर तैनात

सासष्टी : मडगाव नगरपालिकेतर्फे पावसाळापूर्व कामांना सुरुवात झाली असून २५ पैकी जवळजवळ सहा प्रभागांतील कामे पूर्ण झाली आहेत. यात १,२,३,१२,१३,१४ या प्रभागांचा समावेश आहे.

प्रभाग १२ मधील कोंबवाडा परिसरात नगरसेवक सगुण नायक यांच्या देखरेख व मार्गदर्शनाखाली नाले स्वच्छ करणे, रस्त्याच्या बाजूची झाडेझुडपे कापणे, नाल्यावरील सिमेंटच्या लाद्या दुरुस्त करणे व काही ठिकाणी बदलणे यांसारखी कामे पूर्ण झाली आहेत. कोंबवाड्यावर कचरा फेकण्यासाठी जी जागा आहे, तीसुद्धा नियमित स्वच्छ केली जाते, असे सगुण नायक यांनी सांगितले.

कोंबवाड्यावरील काम पूर्ण करण्यासाठी सात दिवस लागले. त्यासाठी नगरपालिकेने दहा मजुर दिले होते. ही केवळ प्राथमिक फेरी असून दुसऱ्या फेरीत अन्य कामे हातात घेतली जातील. केवळ मुख्य रस्त्यांवरीलच नव्हे, तर गृह सोसायट्या व आतील भाग सुद्धा स्वच्छ करण्यात आल्याचे नायक यांनी सांगितले.

१६ मेपर्यंत पूर्ततेचे लक्ष्य

१६ मेपर्यंत मडगावमधील सर्व प्रभागांतील पावसाळापूर्व कामे पूर्ण करण्याचे पालिकेचे लक्ष्य आहे. त्यासाठी ३० मजूर तैनात केले असून दहाजणांची एक अशा तीन तुकड्या केल्या आहेत. एकाचबरोबर तीन प्रभागांमधील कामे हातात घेतली जात आहेत.

कचरा नेण्यासाठी तीन ट्रकांची व्यवस्था केली असून प्रत्येक ट्रकवर पाच कामगार ठेवले आहेत. पालिकेने पावसाळापूर्व कामासाठी वेळापत्रक तयार केले असून त्यानुसार कामे पूर्ण केली जात आहेत.

२५ मार्चपासूनचे कामाचे वेळापत्रक

१) २५ मार्च ते १ एप्रिल प्रभाग ४,५,१५,

२) २ ते ८ एप्रिल प्रभाग ६,१६,१७

३) ९ ते १६ एप्रिल प्रभाग ७,८,१८

४) १७ ते २४ एप्रिल प्रभाग ९,१९,२०

५) २५ एप्रिल ते २ मे प्रभाग १०,११,२१

६) ३ ते ९ मे प्रभाग २२,२३,२४

७) १० ते १६ मे प्रभाग २५ व शहरी भाग.