Margao: मडगावात पादचारी पूल बंद! टॅक्सीचालक, दुकानदारांमध्ये नाराजी; साबांखा मंत्र्यांनी केली पाहणी

सासष्टी: मडगाव कोकण रेल्वे स्टेशनवरील आके बाजूचा पादचारी पूल असुरक्षित असल्याचा अहवाल गोवा अभियांत्रिकी महाविद्यालय आणि आयआयटी मद्रास यांनी दिल्याने तो बंद करण्यात आला आहे.

मात्र, हा पूल बंद केल्याने आके बाजूकडील टॅक्सी, रिक्षाचालक, मोटारसायकल पायलट, दुकानदार, तसेच गाडेवाल्यांनी नाराजी व्यक्त केली आहे. हा पूल १९९७ साली बांधला होता. त्यामुळे त्याचे संरचनात्मक सर्वेक्षण करण्यात आले. हा पूल पूर्णत: मोडून तेथे नवा पादचारी पूल बांधण्याचा प्रस्ताव असल्याचे कोकण रेल्वे महामंडळाचे उपक्षेत्रिय सरव्यवस्थापक बबन घाटगे यांनी पत्रकारांना सांगितले.

कोकण रेल्वेच्या सुरक्षेसाठी आकेकडील बाजू पत्र्याने झाकली आहे. जुना पूल बंद केल्याने आके बाजूचे टॅक्सी, रिक्षाचालक, मोटारसायकल पायलट, दुकानदार तसेच गाडेवाल्यांनी चिंता व्यक्त केली आहे. त्यांनी मडगावचे आमदार तथा सार्वजनिक बांधकाम मंत्री दिगंबर कामत यांच्याशी संपर्क साधला आणि त्यांना वस्तुस्थिती कथन केली.

त्याप्रमाणे आज कामत यांनी तेथे जाऊन पाहणी केली तसेच टॅक्सीचालकांशी चर्चाही केली. मंत्री कामत यांनी पत्रकारांना सांगितले, की मी या पुलाचा संरचनात्मक अहवाल पाहिलेला नाही. तरीही मी पुढील आठवड्यात कोकण रेल्वे महामंडळाचे अध्यक्ष तसेच जिल्हाधिकारी यांच्याशी चर्चा करून यावर नेमकी काय उपाययोजना करणे योग्य आहे, याची पडताळणी करणार आहे. मात्र, आकेच्या बाजूने जे पत्रे बांधले आहेत, त्याऐवजी जाळी मारण्याची विनंती करू, असे त्यांनी सांगितले.

वाहतूक व्यवसायावर संकट

येथील टॅक्सीचालक रिषभ कारापूरकर यांनी सांगितले, की हा पादचारी पूल बंद केल्याने तसेच सभोवताली पत्रे मारल्याने आमच्या व्यवसायावर परिणाम झाला आहे. आमची ५० टक्के कमाई कमी झाली आहे. या परिसरातील दुकानदार, रिक्षाचालक, मोटारसायकल पायलट यांचीही हीच स्थिती झाली आहे.

प्रवाशांवर परिणाम नाही

जुना पूल वापरण्यासाठी धोकादायक ठरला आहे. हा पूल बंद केल्याने प्रवाशांवर काहीच परिणाम होणार नाही. मात्र, येथूनच काही मीटर अंतरावर नवीन पादचारी पूल बांधण्यात आला आहे. हा पूल पूर्वीपेक्षा रूंद असून सर्व प्लॅटफॉर्मना जोडलेला आहे. शिवाय येथे लिफ्टचीही व्यवस्था केली आहे, अशी माहिती बबन घाटगे यांनी दिली.