Goa News: कुचेली येथे तिळारी कालव्यात तरुणाचा बुडून मृत्यू; वाचा गोव्यातील दिवसभरातील घडामोडी

२६ वर्षीय तरुण ओंकार प्रभु देसाई (शेट्येवाडा, म्हापसा) याचा म्हापसा येथील कुचेली येथील जलशुद्धीकरण केंद्राजवळील तिळारी कालव्यात बुडून मृत्यू.

फोंडा येथील जुन्या बस स्थानकावर अज्ञात दुचाकीची धडक बसून पादचारी जखमी. दुचाकीसह चालकाने काढला पळ.

मुरगाव भाजप मंडळ आणि आमदार संकल्प आमोणकर यांनी मुख्यमंत्री डॉ. प्रमोद सावंत यांचा वाढदिवस सडा येथे साजरा केला आणि गोव्याच्या प्रगतीसाठी त्यांच्या दूरदृष्टीचे कौतुक केले. आमोणकर म्हणाले की, मुख्यमंत्र्यांच्या गतिमान नेतृत्वाखाली मुरगावमधील महत्त्वाचे प्रकल्प मंजूर करण्यात आले आहेत.

भाजपचे राज्यसभा खासदार आणि माजी प्रदेशाध्यक्ष सदानंद तानावडे यांनी दवर्ली रेल्वे फाटकाजवळ प्रस्तावित उड्डाणपूलाच्या जागेची गुरुवारी (24 एप्रिल) रेल्वे अधिकाऱ्यांसोबत पाहणी केली.

राष्ट्रीय आपत्ती व्यवस्थापनाच्या अंतर्गत मुर्डी खांडेपार येथे शुक्रावारी सकाळी होणार मॉक ड्रील. मॉक ड्रीलच्या पार्श्वभूमीवर उपजिल्हाधिकारी शुभम नाईक यांनी संबधीत सर्व सरकारी यंत्रणेसह घेतला स्थितीचा प्रत्यक्ष आढावा‌.

स्थायी समितीच्या विषयावरून डिचोली पालिका मंडळाची बैठक तहकूब. मात्र 'पहलगाम' मधील हल्ल्याचा पालिकेकडून निषेध. सोमवारी (ता. २८) रोजी होणार स्थायी समितीची बैठक.

पणजी पोस्ट ऑफिसजवळ बेशिस्तपणे पार्क केलेली चारचाकी. त्यामुळे स्कूल बस आणि उन्हात मुलांनी 15 मिनिटे तटकळत बसावे लागले. काही लोक संतापले होते. वाहतूक पोलीस नसल्याने लोक बेशिस्तपने गाड्या पार्क करतातं.

आपल्या वाढदिवसानिमित्त सर्व सेलिब्रेशनचे कार्यक्रम रद्द केले तरी सेवा कार्यक्रम सुरू आहेत. लोकांनी आपणास शुभेच्छा देण्यासाठी गर्दी न करता आरोग्य शिबिरांचा लाभ घेत आपले आरोग्य निरोगी राखावे, हीच आपणास गोमंतकीयांकडून मोठी शुभेच्छा व भेट ठरणार - मुख्यमंत्री डॉ. प्रमोद सावंत. रवींद्र भवनात आयोजित मेगा आरोग्य शिबिरास भेट देऊन मुख्यमंत्र्यांनी केली पाहणी.

पहलगाम येथील दहशतवादी हल्ल्यामुळे, गोव्याच्या आमदार देविया राणे यांनी त्यांचा वाढदिवस साजरा न करण्याचा निर्णय घेतला आहे. त्यांनी त्यांच्या हितचिंतकांना त्यांच्या वाढदिवसानिमित्त कोणत्याही भेटी किंवा समारंभाचे नियोजन टाळण्याची विनंती केली आहे.

सांगे येथील भाटी पंचायत येथील विलियन गावातील वेळीपवाडा येथील झोपडीत एलपीजी सिलिंडरचा स्फोट झाला. काही घरातील वस्तूंचे नुकसान झाले. कोणतीही जीवितहानी झाली नाही.