Mapusa Municipal Council: वादग्रस्त शेड उभारणीस म्हापसा पालिकेने दिला हिरवा कंदील!

दत्तवाडी, म्हापसा येथील स्मशानभूमी शेजारील खुल्या कोमुनिदाद जागेत वर्कशॉप उभारण्यासाठी पोलादी शेडचे बांधकाम सुरू केल्याने शहरात खळबळ माजली होती. या वादग्रस्त बांधकामास अनेक समाज कार्यकर्त्यांनी एकत्रित येत जोरदार हरकत घेतली असताना, यात नवीन अद्यतन (अपडेट) असे की म्हापसा पालिकेने या शेड उभारणीला बांधकाम परवाना मंजूर केला.

पालिका सूत्रांनी सांगितले की, म्हापसा ग्रामस्थ हिंदू सभाने म्हापसा पालिकेकजवळ या जागेत बांधकाम उभारणीसाठी परवानगी मागितली होती. संबंधितांनी पालिकेला आवश्यक परवान्यांची प्रत उपलब्ध करुन अर्ज केला होता. पीडीएमधून सनद सादर केल्याने पालिकेने वरील अर्जदारास बांधकाम परवाना मंजूर केला.

म्हापसा ग्रामस्थ हिंदू सभाने म्हापसा पालिकेजवळ २.५लाख रुपये दंडसह एकूण १७ लाख रुपये शुल्क भरले. पालिकेच्या पूर्वपरवानगी शिवाय या शेड उभारणीचे काम चालू केल्यानेच हा अडीज लाखाचा दंड ठोठावण्यात आला आहे.

उपलब्ध माहितीनुसार, स्मशानभूमीलगत असलेली ही खुली जागा एका मोटरवाहन कंपनीजवळ करार करून भाडेपट्टीवर दिल्याचे समजते. या कंपनीत एका सत्ताधारी प्रमुख नेत्याची हिस्सेदारी आहे, अशी माहिती समोर येत आहे.

कोमुनिदाद जागेत अशाप्रकारे व्यावसायिक आस्थापन उभे राहत असल्याने, शहरातील काही लोकांनी तसेच समाजकार्यकत्याने या प्रकाराला तीव्र विरोध दर्शविला होता. तसेच संबंधितांवर कारवाई करीत ही जागा पूर्ववत करण्याची मागणी केली होती. मात्र आता पालिकेने बांधकाम परवाना मंजूर करीत, शेडच्या बांधकामाला हिरवा कंदिल दिल्याने या प्रकाराला वेगळी कलाटणी मिळाली आहे.

प्राधिकरणांकडून मान्यता

म्हापसा ग्रामस्थ हिंदू सभेतर्फे म्हापसा पालिकेकडे बांधकाम परवान्यासाठी अर्ज केला होता. त्यानुसार पालिकेने संबंधितांना गेल्या शुक्रवारी परवानगी मंजूर केली. या जागेत म्हापसा पालिकेची पूर्वपरवानगी घेतल्याशिवाय शेड उभारणीच्या कामास चालना दिली. परिणामी, पालिकेत लेखी तक्रार दाखल होताच, पालिकेने ते काम थांबविण्याची नोटीस जारी केली होती. कालांतराने म्हापसा पालिकेजवळ प्रतिवादीकडून अर्ज दाखल होताच, तसेच त्यांनी पालिकेला संबंधित प्राधिकरणांकडून मिळवलेले परवाने उपलब्ध केल्यामुळे या शेडच्या बांधकामास परवानगी दिल्याचे समजते.