Mapusa News : म्हापशात तंबाखूविरोधी कारवाई

कोटपा कायद्यानुसार (Cigarettes and Other Tobacco Products Act) तंबाखूविरोधी कारवाई करताना म्हापसा उपविभागाने चालू वर्षात कालपर्यंत एकूण १०४५ प्रकरणे नोंदवून तब्बल २ लाख ९ हजार रुपये दंड वसूल केला. याच कारवाईअंतर्गत बुधवारी म्हापसा, हणजूण व कोलवाळ पोलिसांनी तंबाखू विक्रेत्यांवर कारवाई केली.

एसडीपीओ म्हापसा जिवबा दळवी यांनी सांगितले की, नामोशी-गिरी येथे म्हापसा पोलिसांनी कारवाई करीत समसुद्दीन जमिल शेख (२८, वेर्ला) यास अटक केली. त्याच्याकडून १० हजारांचा गुटखा व सिगरेट जप्त केले.

संशयित हा नामोशी येथे सरकारी प्राथमिक शाळेजवळ तंबाखू उत्पादनाची विक्री करीत होता, तर, हणजूण पोलिसांनी मूळच्या मध्य प्रदेशमधील संशयित इब्राहिम याच्याकडून ४० हजार रुपयांचा तंबाखूजन्य पदार्थ जप्त केला.

त्याचप्रमाणे, कोलवाळ पोलिसांनी कोटपाअंतर्गत दोन स्वतंत्र गुन्हे नोंदवून दोघांना अटक केली. या प्रकरणी पोलिसांनी संशयित अरुण कुमार (रा. साई कॉलनी माडेल) व संशयित राम राज निसाद (उत्तर प्रदेश) यांना अटक केली. दोघांकडून ४३८० रुपयांचा मुद्देमाप जप्त केला. या सर्व संशयितांना अटक करून नंतर जामिनावर सोडले.

कदंब वाहतूक मंडळाचे आभार : साळकर

नोटचे (भारत) सचिव डॉ. शेखर साळकर यांनी म्हटले आहे की, तंबाखूविरोधी कार्यकर्ते, इतर संघटनांचा दबाव तसेच केटीसीचे अध्यक्ष व इतर अधिकाऱ्यांच्या हस्तक्षेपानंतर केटीसीच्या बसगाड्यांवर तंबाखूची जाहिरातबाजी केली जाणार नाही, असे आश्वासन मिळाले आहे.

हे पाऊल उचल्याबद्दल साळकर यांनी केटीसीचे चेअरमन, सरचिटणीसांचे आभार मानले. जिल्हाधिकार्‍यांनी राज्यातील तंबाखूच्या जाहिराती रद्द करण्याचे निर्देश जारी करावेत.

पणजीत मांडवी नदीच्या काठावर पानमसाल्याचे मोठे होर्डिंग लागलेत ते हटवावे, अशी मागणी साळकर यांनी केली.

धेंपे महाविद्यालयात जागृती

धेंपे कला आणि विज्ञान महाविद्यालयाच्या विद्यार्थ्यांना तंबाखू आणि अंमलीपदार्थांच्या व्यसनाविरोधात जागृती करण्यात आली. यावेळी राष्ट्रीय तंबाखू निर्मुलन संघटनेचे अध्यक्ष डॉ. शेखर साळकर, प्राचार्य डॉ. वृंदा बोरकर यांच्यासह इतर मान्यवर उपस्थित होते.

तंबाखूविरुद्ध जनजागृती मोहिमेचा एक भाग म्हणून शैक्षणिक संस्थांमध्ये व्याख्यान आयोजित करण्यात येत आहे. डॉ. साळकर यांनी विद्यार्थ्यांना भारतातील तंबाखू नियंत्रणाचे विविध पैलू आणि तंबाखूच्या सेवनामुळे होणारे आरोग्याचे विविध धोके याविषयी माहिती दिली.