आणि ‘त्या’ मायलेकींसाठी धावून आली ‘सावित्री’

सांगे: सांगे (Sanguem) मतदारसंघात कठीण परिस्थितीचा सामना करणारी अनेक कुटुंबे (Family) आहेत. यातील काहीजण दुःख गिळून दिवस कंठीत असतात. विळियण भाटी सांगे येथील दुर्दैवी माय-लेकीचे हे कुटुंब असेच दिवस कंठीत आहे. दोन दिवसांपूर्वी सामाजिक कार्यकर्ते अमित नाईक (Amit Naik) यांनी या दुर्दैवी माय लेकींची करुण कहाणी सोशल मीडियावर व्हायरल केली होती. त्यानुसार काही लोकांनी आपल्या परीने मदत देण्यासाठी पुढाकार घेतला. समाजसेविका सावित्री कवळेकर (Savitri Kavlekar) यांनी माय लेकींची भेट घेत त्यांना कडधान्य व इतर मदत केली. तसेच जमिन उपलब्ध झाल्यास दोघींना घर बांधून देण्याचा शब्द दिला. (Many families in Sanguem in Goa are facing flood situation)

श्रीमती नाईक (46 वर्षे) आणि तिची मुलगी तेजा (32) असे दोघांचेच हे कुटुंब एकमेकांचाच आधार बनले आहे. तेजाला आधाराला बाप ही नाही आणि भाऊही नाही दोघांच्या जाण्याने दोघांच्या मनावर प्रचंड दडपण आल्याने त्यात हलाखिची परिस्थिती जगत असल्याने या दोन्ही मायलेक पार खचून गेली आहेत. सरकारच्या कोणत्याही योजना सवलती मिळत नाही, रोजंदारी करण्यासाठी अंगात ताकत नाहीत. त्यामुळे धुणी-भांडी करुन आठवड्याला तीनशे रुपये मिळतात. त्यावर दिवस ढकलावे लागतात. घर वजा झोपडी गावातील तरुणांनी बांधली तर त्यावर पत्रे रमाकांत नाईक यांनी दिले. चुडती वापरून भिंती केल्या, गॅस सिलिंडर दोन वर्षे भरला नाही. वीज नाही, नळ नाही, झोपण्यासाठी नीट जागा नाही, ओल्या जमिनीवर प्लास्टिक ताडपत्री त्यावर अंथरुण, खाण्याचे वांदे, शेजारी देईल तेव्हा खाईल अशी परिस्थिती त्यांची आहे.

ही परिस्थिती सोशल मीडियावर नुकतीच अमित नाईक यांनी व्हायरल केल्यानंतर अनेकांचे पाय त्या झोपडीजवळ धावून आले. अनेकांनी आपापल्या परीने मदत दिली. त्यात समाजसेविका सावित्री कवळेकर हिने त्यांची भेट घेऊन कडधान्य आणि गॅस सिलिंडर दिला. जमीन मालकांची भेट घेऊन झोपडीच्या ठिकाणी छोटेसे घर बांधून देण्यासाठी परवानगी मागितली. जमीन मालकांनी चार दिवसात याबाबत सांगतो असा शब्द दिला आहे. त्यांनी होकार दिल्यास घर बांधून देणार असल्याचे सावित्री कवळेकर हिने सांगितले आहे. आपल्याला अशी परिस्थिती पाहून वाईट वाटले असून शक्य तितक्या लवकर या माय-लेकींचे दुःख दूर करण्यासाठी प्रयत्न करणार असून शासकीय सवलती मिळवून देण्यासाठीही पुढाकार घेणार असल्याचेही कवळेकर यांनी स्पष्ट केले आहे.