मनोहर पर्रीकरांची बदनामी; काँग्रेसने जाहीर माफी मागावी.. : मुख्यमंत्री

Goa BJP: विधानसभा निवडणुकीला आता अवघे काही तास शिल्लक राहिले आहेत. गेल्या काही दिवसात प्रमुख राजकीय पक्षांचे केंद्रातील नेते गोव्यात प्रचारासाठी दाखल झाले आहेत. त्यांनी दारोदारी जाऊन आपल्या उमेदवारांसाठी प्रचार केला. प्रचार भाषणामध्ये नेत्यांनी आपल्या विरोधकांवर सणसणीत टीका-टिप्पणी देखील केली.

दरम्यान कॉंग्रेसच्या सभेत दक्षिण गोव्याचे खासदार फ्रान्सिस सार्दिन (Francisco Sardinha) यांनी भाजपवर निशाणा साधताना स्व. मुख्यमंत्री मनोहर मनोहर पर्रीकर (Manohar Parrikar) यांच्याबद्दल केलेल्या आक्षेपार्ह वक्तव्यामुळे भाजप नेते आणि सध्याचे मुख्यमंत्री प्रमोद सावंत (Pramod Sawant) यांनी कॉंग्रेसने जाहीर माफी मागण्याची मागणी केली आहे.

सार्दिन भाषणावेळी म्हणाले होते की, 'माणसाला मरताना सुखाचे मरण यावे अशी आपली इच्छा असते. मात्र मनोहर पर्रीकरांच्या नशिबी ते सुख नव्हते. नाकातून नळया घेऊन त्यांना शेवटच्या श्वासापर्यंत काम करावे लागले, कारण त्यांनी फक्त खोटे राजकारण केले. पर्रीकरांनी आणि भाजपने फक्त लोकांना फसवले.'

भाजपतर्फे याचा निषेध व्यक्त करण्यात येत आहे. सध्याचे मुख्यमंत्री प्रमोद सावंत यांनी आपल्या ट्विटर अकाऊंटवरून या प्रकारची कॉंग्रेसने (Congress) जाहीर माफी मागावी अशी मागणी केली. ते म्हणाले की,'गोव्यातील सर्वात उत्कृष्ट नेत्यांपैकी एक मनोहर पर्रीकर यांच्यावर निशाणा साधण्यासाठी काँग्रेसने त्यांच्या निवडणूक प्रचारात अत्यंत दयनीय पद्धतीने टीका केली आहे. राहुल गांधींच्या गोव्यातील रॅलीत काँग्रेसच्या वरिष्ठ नेत्यांनी केलेल्या अशा टिप्पण्यांमुळे मी आणि माझे सहकारी गोवावासीय दुखावले आहोत. काँग्रेसने गोव्यातील जनतेची जाहीर माफी मागावी'

यावर कॉंग्रेसची भूमिका पाहणे महत्वाचे ठरणार आहे.