Mandrem Sarpanch : पद गेले तरी पर्वा नाही; मांद्रे पंचायत क्षेत्रात जुगाराला विरोधच

Mandrem Sarpanch Adv. Amit Sawant : मांद्रे पंचायत क्षेत्रात कसल्याच प्रकारचा जुगार होऊ देणार नाही. जुगाराच्या विरोधात पेडणे पोलिसांना सरपंच या नात्याने आपण निवेदन सादर केलेले आहे. आता पेडणे पोलिसांनी मांद्रे पंचायत क्षेत्रामध्ये कुठे-कुठे जुगार चालू आहे? तो जुगार पूर्णपणे बंद करावा.

प्रसंगी आपले सरपंचपद गमावण्याची जरी वेळ आली तरी आपल्याला पर्वा नाही. परंतु मांद्रे पंचायत क्षेत्रात यापुढे जुगार नकोच; असा इशारा मांद्रेचे सरपंच ॲड. अमित सावंत यांनी दिला.

मांद्रे मतदारसंघात सध्या मोठ्या प्रमाणात जुगाराचे पेव आहे. ठिकठिकाणी जुगाराबरोबरच मटका बीट घेणेही चालू आहे. काही बीटवाले तर बसस्टॉपवर बसून बीट घेताना दिसत आहेत. त्यामुळे एखादा प्रवासी बससाठी जर त्या शेडमध्ये उभा राहिला तर त्याला राहता येत नाही.

पेडणे पोलीस निरीक्षक सचिन लोकरे हे कार्यक्षम अधिकारी आहेत . त्यांनी आता कार्यवाही करावी, अशी मागणी अमित सावंत यांनी केली. मुख्यमंत्री डॉ. प्रमोद सावंत यांनीही गॅम्बलिंगच्या विरोधात कडक पावले उचलणार असे जाहीर केले होते. त्याचेही आपण स्वागत करतो. त्यामुळे आता तेच योग्य पद्धतीने पावले उचलतील, असा विश्वास अमित सावंत यांनी व्यक्त केला.

नागरिकांच्या तक्रारी वाढल्या

सरपंच अमित सावंत यांनी सांगितले की, आपण सरपंच या नात्याने पेडणे पोलिसांना लेखी निवेदन सादर केले आहे. मांद्रे गावात जिथे-जिथे जुगार चालू असेल तो संबंधित विभागाने लवकरात लवकर बंद पाडावा. अनेक गावांतील नागरिक आणि महिलांच्या तक्रारी आपल्याकडे आलेल्या आहेत. त्यामुळे आपल्यालाही पाऊल उचलावे लागले.