Morjim Crime: चिंताजनक! 'जमीन व्यवहारा'तून एकावर प्राणघातक हल्ला; पोलिसांकडून उशिरा गुन्हा दाखल

Morjim Assault Crime News

मोरजी: जमीन विक्री किंवा दलाली करत असताना काही गुंडांकरवी मारहाण करण्याचे प्रकार सध्या वाढत आहेत. २ डिसेंबर रोजी मोरजी पंचायत क्षेत्रात डोंगरमाळरानावर काही व्यक्ती एकमेकांना जमिनी दाखवण्यासाठी गेले असता, त्या ठिकाणी एका बिल्डरच्या माणसाने राजेश फडते नामक व्यक्तीला मोठ्या प्रमाणात मारहाण करून जखमी केले.

जखमी नागरिकाच्या बाजूने देशपांडे यांनी त्याच दिवशी मांद्रे पोलिस स्थानकावर लेखी स्वरूपात तक्रार दिली होती. परंतु मांद्रे पोलिसांनी संबंधित आणि संशयिताविरोधात उशिरा गुन्हा नोंदवला.

दरम्यान, मोरजी डोंगरमाळरानावर राजेश फडते यांच्यावर झालेल्या खुनी हल्ल्यामागे असलेल्या संशयिताविरोधात अजूनही पोलिसांनी तक्रार नोंदवली नाही. मात्र, मांद्रेचे माजी सरपंच महेश कोनाडकर यांच्याविरोधात असलेली तक्रार लगेच नोंदवली गेली आणि दोन दिवसांनी संशयितांना पकडले. राजेश फडते यांच्यावर झालेल्या हल्ल्यामागे कोण आहेत? त्यांचा पोलिस अजून शोध का घेत नाहीत? असे प्रश्‍न आता नागरिक उपस्थित करत आहेत.

मांद्रे पोलिसांकडे संपर्क साधला असता राजेश फडते यांना ज्या पद्धतीने मारहाण झाली आहे ते पाहून त्यांच्या तक्रारीची दखल घेत मांद्रे पोलिसांनी अज्ञाताविरोधात गुन्हा नोंदवल्याची माहिती पोलिसांनी दिली.

मध्यस्थींना मिळते कमिशन

कमी वेळात जास्त पैसा कमावण्यासाठी काही नागरिक जमीन व्यवहारांमध्ये गुंतल्याचे स्पष्ट दिसते. ज्या ठिकाणी मोकळ्या जागा आहेत. त्या जागेची पाहणी दलाल करतात आणि नंतर एखादा जमीन विकत घेणारा सापडला तर त्याला ती जमीन विकतात. जमीनदाराकडून कमिशन आणि घेणाऱ्याकडूनही कमिशन मिळून लाखो रुपये जमीन विक्री करणाऱ्या मध्यस्थींना मिळतात. अशा व्यवहारातून खुनी हल्ले होण्याचे प्रकार आता घडत असल्याचे चित्र दिसून येते.