मोठी बातमी! गोव्याच्या राज्यपालांकडे महाराष्ट्राचा कार्यभार

महाराष्ट्रातील राजकीय पेचप्रसंगाच्या काळात मोठी बातमी समोर येत आहे. राज्यपाल भगतसिंग कोश्यारी यांना कोरोनाची लागण झाल्याचे सांगण्यात येत आहे. माहिती देताना राजभवनच्या एका अधिकाऱ्याने सांगितले की, बुधवारी तपासणी केल्यानंतर राज्यपालांना कोरोनाची लागण झाल्याचे आढळून आले, त्यानंतर त्यांना दक्षिण मुंबईतील रिलायन्स फाऊंडेशन रुग्णालयात दाखल करण्यात आले आहे. गोव्याचे राज्यपाल पी. एस. श्रीधरन पिल्लई यांच्याकडे महाराष्ट्राचा कार्यभार सोपवण्यात आला आहे.

महाराष्ट्रात राजकीय संकट
सत्ताधारी शिवसेनेचे बंडखोर नेते एकनाथ शिंदे यांनी बुधवारी दावा केला की, 40 बंडखोर आमदार आपल्यासोबत आसाममधील गुवाहाटी येथे पोहोचले आहेत. गुवाहाटी विमानतळाबाहेर पत्रकारांशी बोलताना शिंदे म्हणाले, माझ्यासोबत येथे 40 आमदार उपस्थित आहेत. माझ्यासोबत आणखी 10 आमदार लवकरच सामील होतील. मला कोणावरही टीका करायची नाही. दिवंगत बाळासाहेब ठाकरे यांनी स्थापन केलेली शिवसेना सुरू ठेवण्यासाठी आम्ही इच्छुक आहोत.