Madkai Molestation Case: विद्यार्थिनी विनयभंगप्रकरणी मडकईवासी संतप्त; म्हार्दोळ पोलिस ठाण्यावर धडक मोर्चा

Madkai Locals Gather At Mardol Police Station: मडकईतील विद्यार्थिनीच्या विनयभंगप्रकरणी पोलिसांनी वेळकाढू धोरण न अवलंबता दोषी शारीरिक शिक्षकावर त्वरित कारवाई करावी, कुणाच्याही दबावाखाली येऊ नये, अशी मागणी करत पोलिसांनी दिरंगाई केल्यास आम्ही रस्त्यावर उतरू, असा इशारा मडकईतील ग्रामस्थांनी दिला.

मडकई येथील ग्रामस्थांनी आज (रविवारी) म्हार्दोळ पोलिस स्थानकात येऊन पोलिस निरीक्षक मोहन गावडे यांच्याशी चर्चा केली.

संशयितांनी जामिनासाठी न्यायालयात धाव घेतल्याने न्यायालयाच्या निर्णयानुसार पुढील कारवाई केली जाईल, अशी ग्वाही गावडे यांनी दिली.

मडकईतील एका विद्यालयातील विद्यार्थिनीच्या विनयभंगप्रकरणी म्हार्दोळ पोलिस स्थानकात तक्रार दाखल केली आहे. त्यानुसार म्हार्दोळ पोलिसांनी या शिक्षकाविरुद्ध गुन्हाही नोंदवला आहे.

पण कारवाईला विलंब होत असल्याने संतप्त झालेल्या मडकईवासीयांनी सकाळी म्हार्दोळ पोलिस स्थानकात येऊन संताप व्यक्त केला व दोषी शिक्षकावर त्वरित कारवाई करण्याची मागणी केली.

जामीन अर्जावर सुनावणी

याप्रकरणी शारीरिक शिक्षक, अन्य एक शिक्षिका तसेच मुख्याध्यापकाने जामिनासाठी पणजीतील बाल न्यायालयात अर्ज दाखल केला असून त्यावर मंगळवारी (५ सप्टेंबर) सुनावणी होणार आहे.

जोपर्यंत कारवाई होत नाही, तोपर्यंत ग्रामस्थ स्वस्थ बसणार नाहीत. प्रसंगी रस्त्यावरही उतरू, असा इशारा ग्रामस्थांनी दिला आहे.

...अन्यथा रस्त्यावर उतरणार