Goa Crime: फार्म हाउसमधील रोख, दुचाकी घेऊन काढला होता पळ, 6 महिन्यांपासून फरार असलेल्या आरोपीला अटक

मडगाव: मळकर्णे-केपे येथील एका फार्मवर व्‍यवस्‍थापक म्‍हणून काम करणाऱ्या दीपंकर कश्‍‍यप या संशयिताने फार्म हाउसमधील रोख आणि दुचाकी घेऊन पळ काढला होता. मागचे सहा महिने फरार असलेल्‍या या संशयिताला दोन दिवसांपूर्वी केपे पोलिसांनी कांदोळी येथे अटक केली. संशयिताने ही चोरी केल्‍यानंतर झारखंडमध्‍ये पळ काढला होता.

या प्रकरणी फार्म हाउसचे मालक योगेश कुंकळ्येकर यांनी केपे पोलिसात तक्रार दिली होती. १० एप्रिल रोजी ही चोरीची घटना घडली होती. फार्म हाउसमध्ये असलेले पावणेदोन लाख रुपये रोख, एक मोबाईल आणि दुसऱ्या एका सहकाऱ्याची दुचाकी घेऊन त्‍याने पळ काढला होता.

हा संशयित त्‍यानंतर झारखंडला पळून गेला होता. झारखंडमध्‍ये जाऊन त्‍याचा शोध घेण्‍याचा प्रयत्‍न केला असता तो सापडला नव्‍हता.

या प्रकरणातील तपास अधिकारी असलेले केपेचे उपनिरीक्षक सोमेश प्रभुदेसाई हे त्‍याच्‍या मोबाइलच्या ट्रॅकींगवर होते. १२ सप्‍टेंबर रोजी संशयिताच्‍या मोबाईल ट्रॅकींगवर तो कांदोळी येथे असल्‍याची माहिती मिळाल्‍यावर उपनिरीक्षक प्रभुदेसाई, हवालदार प्रणय नाईक व पोलिस शिपाई अमीर नाईक हे तिघेही कांदोळीला रवाना झाले.

कांदोळी व कळंगूट भागातील सहा-सात रिसॉर्टमध्‍ये जाऊन संशयिताचा शोध घेण्‍याचा प्रयत्‍न केला असता, कांदोळीतील एका रिसॉर्टमध्‍ये तो रिसेप्‍शन काऊंटरवर बसलेला दिसला.