Arambol Beach : फ्ली मार्केट गेले; मसाजवाले ‘जैसे थे’!

येथील किनारी भागात विदेशींचे फ्ली मार्केट वाल्यांना हाकलून लावण्यात यश आले. मात्र, लमाणी फिरते विक्रेते, आईस्क्रीम विक्रेते, मसाजवाले तसेच अन्य वस्तू विकणाऱ्यांना हाकलून लावण्यासाठी,पोलिस कोणत्या मुहूर्ताची वाट पाहत आहेत, असा प्रश्‍न स्थानिकांतून विचारला जात आहे.

हरमल किनाऱ्यावर सध्या लमाणी महिला, खेळणी ते खाऊच्या प्लास्टिक बंद पिशव्या घेऊन काहीजण विक्री करीत असल्याचे चित्र दिसते. त्यापैकी काही मसाजवाले थेट पर्यटक बसतात, तिथे जाऊन मसाज करतात, काहीजण हात साफ करण्याच्या हेतूने किनाऱ्यावर वावरत असतात.

किनारी भागांत परप्रांतीय लोकांचा मोठा गट असून पोलिसांना ते दाद देत नसल्याचे काहींनी सांगितले. त्यामुळे पोलिस थेट कारवाई करणे टाळतात, असे एकाने सांगितले. वास्तविक किनाऱ्यावर विदेशी लोकांच्या फ्ली मार्केटला आक्षेप घेऊन ते मार्केट बंद पाडले, हे योग्य झाले.

मात्र फिरत्या विक्रेत्यांना बंदी घालण्याची कारणे कोणती, असा सवाल काहीजण करीत आहेत. लमाण्यांना व्यवसाय करण्यावर बंदीची मागणी व्यावसायिकांनी कित्येकदा करूनही पोलिसांनी कानाडोळा करण्या मागे ''अर्थपूर्ण'' कारण असल्याचे सांगून काही व्यावसायिकांनी नाराजी व्यक्त केली.

आईस्क्रीम विक्रेत्यांची मुजोरी !

हरमल किनाऱ्यावर आईस्क्रीमचे गाडे थेट किनाऱ्यावर उभे करून विक्रेते पोलिसांना वाकुल्या तर दाखवीत नाही ना, अशी चर्चा चालू आहे. या पर्यटन हंगामात किमान 7 हातगाडे पाण्यापर्यंत लावून पोलिस आपल्याला हात लावू शकणार नाहीत,असा संदेश व मुजोरपणा आईसक्रिम तसेच फ्रूट विक्रेते देत असल्याचे दिसून येते.