Chapora Jetty : खडकावर अडकलेल्या केरळमधील पर्यटकास वाचवले; बोटचालकाचे धाडस

शापोरा जेटीजवळील समुद्री खडकावर अडकून पडलेल्या एका तरुणास स्थानिक बोटचालकाने सुखरूप वाचविण्याची घटना रविवारी उघडकीस आली.

प्राप्त माहितीनुसार, ही घटना रविवारी (ता. 9) सकाळी 10 च्या सुमारास घडली. केरळमधील दोन पर्यटक हे शापोरा जेटीजवळील खडकावर गेले होते. तेव्हा भरतीमुळे पाणी अचानकपणे वाढले. या प्रकारामुळे दोघेही घाबरले व माघारी परतताना दीपू पी. के. हा तरुण खडकावरच अडकून राहिला, तर त्याचा मित्र राहुल संतोष हा स्वतःहून तेथून कसाबसा बाहेर पडला.

राहुल हा दुसऱ्या खडकावर बसला होता. माघारी येताना आपला मित्र कुठेच दिसत नसल्याने तो प्रचंड घाबरला आणि या भीतीपोटी त्याने या घटनेची कोणाला माहितीही दिली नाही. सुमारे तासभर दीपू या खडकावरील पाण्यात अडकून पडला होता.

दीपू पी. के. हा या प्रकारामुळे बराच भयभीत झाला होता. वेळेत बोटचालक राज हा तिथे पोहोचल्याने केरळमधील या तरुण पर्यटकाचा जीव वाचू शकला. राज चोडणकर हा मासेमारी करून परत धक्क्यावर येत होता..

दीपूकडे फेकले लाईफ जॅकेट !

यावेळी स्थानिक बोटचालक राज चोडणकर (रा. गुडे - शिवोली) याने या खडकावर अडकलेल्या दीपूला पाहिले. त्यानंतर राजने आपली बोट दीपूच्या दिशेने वळवून त्याला मदत पोहचावी, या हेतूने बोटमधील लाईव्ह जॅकेट त्याच्याजवळ फेकले. ते त्याने घेऊनही तो घाबरला होता.

मात्र राज याने त्यास सुखरूप पाण्यातून बोटवर घेत त्याला किनाऱ्यावर आणले. राजच्या या कामगिरीबद्दल त्याचे सर्वत्र कौतुक होत आहे.