Loksabha Election 2024 : ही निवडणूक देशाचे भवितव्य ठरवणारी : ॲड. नरेंद्र सावईकर

Loksabha Election 2024 :

पणजी, भाजपच्या दोन्ही उमेदवारांना जनतेचा मोठा प्रतिसाद मिळत आहे. देशाचे भवितव्य घडवणारी ही निवडणूक आहे याची जनतेला जाणीव आहे.

त्यामुळे १० वर्षाच्या कामगिरीचा आढावा घेत जनता भाजपलाच याखेपेला मतदान करेल, असा विश्वास भाजपचे प्रदेश सरचिटणीस ॲड. नरेंद्र सावईकर यांनी आज येथे पत्रकार परिषदेत व्यक्त केला. यावेळी उत्तर गोवा जिल्हाध्यक्ष महानंद अस्नोडकर, माजी आमदार फ्रान्सिस सिल्वेरा उपस्थित होते.

ॲड. नरेंद्र सावईकर पुढे म्हणाले, की सर्वसामान्य व्यक्ती नजरेसमोर ठेवून सरकारने कारभार केला आहे. त्यामुळे जनतेने या खेपेला भाजपचे सरकार केंद्रात आणण्याचा निर्धार केला आहे. भाजपने संकल्पपत्रातही सर्वसामान्य व्यक्तीच केंद्रस्थानी ठेवली आहे. मोदी यांच्यावर जनतेचा विश्वास आहे.

यामुळे ‘मोदी की गॅरंटी’ ही जनतेला आपली वाटू लागली आहे. सर्व क्षेत्रात सरकारने काम करताना सर्वसामान्य जनतेला लाभ देण्याचाच हेतू ठेवला आहे. देशाप्रमाणेच गोव्यातही विकास झाला आहे. विकासाची फळे लोकांना मिळाली म्हणून मोदी यांच्या नेतृत्वावर जनतेचा विश्वास बसला आहे. त्यामुळे भाजपच्या दोन्ही उमेदवारांना मोठे मताधिक्य मिळेल.

‘सर्वांना सोबत घेऊन भाजपचा प्रचार’

ते म्हणाले, सकारात्मक विचार सोबत घेत सर्वांना सोबत घेऊन भाजपचा प्रचार पुढे जात आहे. सर्व कार्यकर्ते, नेते एकत्र येत उमेदवारांना विजयी करण्यासाठी झटत आहेत. लोकांच्या मोठ्या प्रतिसादामुळे दोन्ही उमेदवार जिंकून येतील यात शंका नाही. भाजपने कल्याणकारी योजना राबवताना कोणताही भेदभाव केलेला नाही. त्यामुळे समाजातील सर्व घटक भाजपसोबत आहेत.