Goa Monsoon: ‘आमठाणे’ धरणातील जलसाठा लागला वाढू

पाऊस सक्रिय झाला असला तरी डिचोलीतील 'आमठाणे' धरण अजून पूर्ण भरलेले नाही. मात्र धरणातील जलसाठा समाधानकारक असून हळूहळू तो वाढत आहे. तरीदेखील हे धरण पूर्ण भरण्यासाठी मुसळधार पावसाची प्रतीक्षा आहे.

पुढील दहा-बारा दिवस मुसळधार पाऊस पडला तर हे धरण पूर्ण भरेल, असा अंदाज आहे. जलस्रोत खात्याच्या अधिकाऱ्यांनीही तशी शक्यता वर्तविली आहे. गुरुवारी सायंकाळपर्यंत या धरणातील जलसाठ्याची पातळी जवळपास ४६.३० मीटर एवढी झाली होती. जलस्रोत खात्याचे कार्यकारी अभियंते के. पी. नाईक यांनी ही माहिती दिली. दरम्यान, पाऊस सक्रिय झाल्यापासून आमठाणे धरणात शापोरा नदीतील पाणी सोडणे बंद केले.

‘आमठाणे’ भरण्याच्या दिशेने

मेणकुरे-धुमासे पंचायत क्षेत्रात येणाऱ्या आमठाणे धरणाचे जलक्षेत्र ५८२ हेक्टर मीटर एवढे आहे. तर पाण्याची पातळी ५२ मीटर एवढी आहे. गेल्या एप्रिल महिन्यापर्यंत या धरणातील जलसाठ्याची पातळी ८ मीटरने घटताना ती ४४ मीटर एवढी झाली होती. मे महिन्यात जलसाठ्याची पातळी ४० मीटर इतकी झाली होती. धरणाचे जलाशय कोरडे पडले होते. त्यामुळे जलसाठा नियंत्रित ठेवण्यासाठी शापोरा नदीवरील साळ बंधाऱ्यातून अतिरिक्त पाणी या धरणात सोडण्यात येत होते.