Quepem : कारवाई कधी? शिकाऱ्यांच्या फासात अडकून आणखी एक बिबट्या ठार

Quepem : दाबे (पाडी) केपेमध्ये शिकारीसाठी लावण्यात आलेल्या पिंजऱ्यात अडकल्याने एका बिबट्याचा मृत्यु झाला आहे. हा पिंजरा रानडुकरांच्या शिकारीसाठी लावण्यात आला होता. शिकार करण्यासाठी लावलेल्या तारेच्या फासात अडकून बिबट्या मरण पावला. या मृत बिबट्याची दात आणि नखे गायब झाल्यामुळे खळबळ माजली आहे. दरम्यान, वनविभाग या प्रकरणाचा तपास करत आहे.

हा प्रकार शनिवारी रात्री गावातील लोकांच्या लक्षात आल्यावर त्यांनी वन खात्याकडे चौकशी केली. त्यानंतर वन अधिकाऱ्यांनी तिथे जात पंचनामा करून बिबट्याचा मृतदेह ताब्यात घेतला. या पूर्वी डिसेंबर महिन्याच्या शेवटच्या आठवड्यात कोपार्डे सत्तरी येथेही असाच एका बिबट्या शिकारी फासात अडकून मृत झाला होता.

या संबंधी वन अधिकाऱ्यांशी संपर्क साधला असता मृत बिबट्या सापडल्याचे त्यांनी मान्य केले. मात्र तो कुजण्याच्या अवस्थेत पोहोचला होता त्यामूळे त्याचे दात कुणी काढून नेले की ते कुजून खाली पडले याचा आम्हीं तपास करत आहोत अशी माहिती त्यांनी दिली.

शिकारी जाळ्यात अडकून बिबट्याचा मृत्यू झाल्याची अशीच एक घटना कोपार्डे येथे घडली होती. शिकारीसाठी वापरण्यात येणाऱ्या जाळ्यात अडकून बिबट्या मरण पावला होता. राज्याचे वनमंत्री विश्वजीत राणे यांनी घडलेल्या घटनेबद्दल सक्त कारवाई करणार असल्याचे म्हटले होते. तसेच, वन कायदे अजून सक्त केले जातील असे वनमंत्री म्हणाले होते. वन परिसरात शिकारी जाळे लावल्याप्रकरणी चौकशी करुन दोषींवर योग्य कारवाई केली जाणार असल्याचे मंत्री राणे म्हणाले होते. मात्र वनमंत्र्यांच्या ईशाऱ्यानंतरही शिकारी जाळ्यात अडकून बिबट्याच्या मृत्युच्या घटना समोर येत आहेत.