CM Pramod Sawant Delhi Visit: अधिवेशन सोडून मुख्यमंत्री दिल्ली दौऱ्यावर; अमित शाहांची घेतली भेट

CM Pramod Sawant Delhi Visit: गोव्यात विधानसभेचे पावसाळी अधिवेशन सुरू असतानाच गुरूवारी मुख्यमंत्री डॉ. प्रमोद सावंत हे दिल्ली दौऱ्यावर गेले. या दौऱ्यात त्यांच्यासमवेत गोव्यातून राज्यसभेत बिनविरोध निवडून गेलेले खासदार आणि भाजपचे प्रदेशाध्यक्ष सदानंद शेट तानावडे देखील आहेत.

मुख्यमंत्री सावंत आणि खासदार तानावडे यांनी केंद्रीय गृहमंत्री अमित शाह यांची त्यांच्या निवासस्थानी भेटी घेतली. यावेळी उत्तर गोव्याचे खासदार आणि केंद्रीय राज्य मंत्री श्रीपाद नाईक देखील उपस्थित होते.

दरम्यान, या दिल्ली दौऱ्यात मुख्यमंत्री सावंत आणि खासदार तानावडे पंतप्रधान नरेंद्र मोदी यांच्यासह आणि भाजपचे राष्ट्रीय अध्यक्ष जे. पी. नड्डा यांची भेट घेणार आहेत. दरम्यान, गोव्याचे पावसाळी अधिवेशन ऐन मध्यावर आले असताना सावंत हे अचानक दिल्लीला गेल्याने राजकीय वर्तुळातून तर्कवितर्क लढवले जात आहेत.