मडगाव: एका वकिलाने चिठ्ठी लिहून पोलिसांवर आरोप करत आत्महत्या केल्याने खळबळ निर्माण झाली आहे. वकिलाचा मृतदेह स्वीकारण्यात त्याच्या कुटुंबीयांनी नकार दिला आहे.
चिठ्ठीत नाव दिलेल्या पोलिसांवार गुन्हा दाखल करण्याची मागणी केली जात आहे. मृत वकिलाच्या मुलावर लैंगिक छळाचा गुन्हा दाखल अलसल्याने या प्रकरणाचा गुंता अधिक वाढला आहे.
मडगावमध्ये वकिल जयंत प्रभू यांनी आत्महत्या केली आहे. आत्महत्येपूर्वी त्यांनी एक चिठ्ठी लिहून पोलिसांवर अत्याचाराचे गंभीर आरोप केले. प्रभू यांनी पोलिसांची नावे नमूद करुन त्यांच्यावर आरोप केले आहेत. आत्महत्येपूर्वी प्रभू यांनी मालमत्तेचे मुलं आणि पत्नी यांच्यात समान वाटप केले.
प्रभू यांच्या आत्महत्येमुळे वकिल संघटना चांगलीच आक्रमक झाली असून, चिठ्ठीत नमूद केलेल्या पोलिसांविरोधात कारवाई करण्याची मागणी केली जात आहे. वकिलांनी मडगाव पोलिस स्थानकात दाखल होत, कारवाई होत नाही तोपर्यंत मृतदेह ताब्यात घेण्यास नकार दिला. प्रभू यांच्या कुटुबियांनी देखील दोषी पोलिसांविरोधात गुन्हा दाखल करण्याची मागणी केलीय.
जयंत प्रभू यांच्या मुलाविरोधात लैंगिक छळाचा गुन्हा
आत्महत्या केलेल्या जयंत प्रभू यांच्या मुलाच्या विरोधात लैंगिक छळाचा गुन्हा दाखल आहे. संशयित मुलावर सध्या बांबोळी येथील इंस्टिट्यूट ऑफ सायकियाट्री अँड ह्युमन बिहेव्हियर (IPHB) येथे उपचार सुरु आहेत.
मिळालेल्या माहितीनुसार पोलिसांनी या प्रकरणी काही दिवसांपूर्वी मुलाच्या घरी चौकशी केली होती. दरम्यान, जयंत प्रभू यांच्या आत्महत्येचे कारण अद्याप समोर आलेले नाही. पण, प्रभू यांच्या चिठ्ठीमुळे गूढ अधिक वाढले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.