Minister Subhash Phaldesai: पोर्तुगीज-इंग्रजी भाषांतर सेवेचा शुभारंभ, सुभाष फळदेसाई

Minister Subhash Phaldesai: गोव्यावर 450 वर्षाहून अधिककाळ असलेल्या पोर्तुगीज राजवटीमुळे येथील अनेक महत्वाचे, ऐतिहासिक दस्तऐवज पोर्तुगीज भाषेत आहेत. यासाठी भाषांतराची गरज भासते, हे लक्षात घेऊन पुराभिलेख खात्याच्या वतीने पोर्तुगीज ते इंग्रजी ऑनलाईन भाषांतर सेवेचा शुभारंभ करण्यात आला आहे.

पुराभिलेख खात्याचे मंत्री सुभाष फळदेसाई यांनी आज या ऑनलाईन भाषांतर सेवेचा प्रारंभ केला. पर्वरी येथील कार्यालयात हा कार्यक्रम पार पडला.

मंत्री फळदेसाई यांनी ऑनलाइन पोर्तुगीज भाषांतर सेवा यासह डॉ. पांडुरंग शेणवी पिसुर्लेकर रिसर्च फेलोशिप योजना आणि मुख्यमंत्री पुराभिलेख प्रकाशन योजना (अभिलेख संशोधन आणि अनुवादाशी संबंधित प्रकाशनांसाठी विशेष सहाय्य) यांची घोषणा केली.

यावेळी विद्याप्रबोधनी  महाविद्यालय, पर्वरी, सोहिरोबानाथ अंबिये सरकारी महाविद्यालय पेडणे आणि पीईएस रवी नाईक महाविद्यालय फार्मागुढी, फोंडा या तीन महाविद्यालयांसोबत शैक्षणिक संशोधनासाठी सामंजस्य करार करण्यात आले.

नागरिकांची अडचण दूर

पुराभिलेख विभागातील विविध दस्तऐवज  पोर्तुगीज भाषेत आहेत, अनेकांना त्याचे भाषांतर करताना अडचणी येतात. त्यामुळे नागरिकांना डिजिटल स्वरूपात पोर्तुगीजमधून इंग्रजीत भाषांतराची सुविधा उपलब्ध करून देण्यात आली आहे. पोर्तुगीज भाषेतील कागदपत्रे ऑनलाईन अपलोड केल्यानंतर त्याचे इंग्रजी भाषांतर पाहायला मिळणार आहे. विशेष बाब म्हणजे संबधिताला ही सर्व प्रक्रिया देखील ट्रॅक करता येणार आहे.