Land Price in Goa: गोव्यात स्वप्नातलं घर घ्यायचंय? 1 एकर जमिनीसाठी मोजावी लागेल 'एवढी' किंमत

1 Acre land Price Goa: गोवा हे राज्य जरी क्षेत्रफळानुसार छोटं असलं तरी इथे असणारे सुंदर समुद्रकिनारे आणि हिरव्यागार निसर्गामुळे अनेकवेळा जमीन खरेदीदार आणि गुंतवणूकदारांसाठी नेहमीच गोवा एक लोकप्रिय ठिकाण ठरलंय. तुम्ही समुद्रकिनारी एखादी जमीन, शेतीसाठी जमीन किंवा घर बांधण्यासाठी एखादं परफेक्ट लोकेशन शोधत असाल तर आधी इथल्या किमती माहिती असणं महत्वाचं आहे. चला मग जाणून घेऊया गोव्यात जमीन विकत घेणं किती सोपं आहे?

समुद्री भागांमधील किंमत काय?

गोव्यातील जमिनीच्या किंमती वेगवेगळ्या घटकांवर अवलंबून असतात. सर्वात महत्त्वाचा घटक म्हणजे ती जमीन कुठे आहे. गोवा समुद्रकिनाऱ्यांसाठी प्रसिद्ध आहे आणि अनेकांना किनारी भागातच जागा विकत घेण्याची इच्छा असते. मात्र लक्षात घ्या समुद्रकिनाऱ्यांजवळील जमिनीला जास्त मागणी असल्यानेच त्या भागातील जमिनीच्या किंमती जास्त असतात.

समुद्रकिनाऱ्यांजवळील जमिनीच्या किंमती प्रति एकर २ ते २० कोटींच्या घरात जाणाऱ्या आहेत, यामध्ये आणखीन प्रीमियम जागा शोधत असाल तर ३० कोटी रुपयांपर्यंत नक्कीच किंमत वाढेल. गोव्यातील आतल्या भागातील जमिनीच्या किंमती कमी असतात.

उदाहरणार्थ, बागा, कळंगुट आणि कांदोळी यांसारख्या समुद्रकिनाऱ्यांजवळील जमिनीच्या किंमती खूप जास्त असतात. मात्र किनारी भागांच्या तुलनेत फोंडा,डिचोली,काणकोण, केपे यांसारख्या भागातील जमिनी अधिक परवडणाऱ्या आहेत. साधारणपणे १ कोटी रुपयांच्या आवाक्यात एक एकरची जमीन बसू शकते.

जमिनीचा प्रकार देखील इथल्या जमिनीच्या किंमतीवर परिणाम करत असतो. गोव्यात जमिनीचे विविध प्रकार आहेत. यांमधील प्रमुख प्रकार निवासी जमीन, शेत जमीन आणि औद्योगिक जमीन होय. निवासी जमिनीचा वापर घरे किंवा व्यावसायिक इमारती बांधण्यासाठी केला जातो, तर शेत जमीन शेती आणि बागायतीसाठी योग्य असते. औद्योगिक जमीन कारखाने किंवा गोदामे बांधण्यासाठी वापरली जाते.

जमिनीची उपलब्धता आणि इथे उपलब्ध असणाऱ्या पायाभूत सुविधा देखील जमिनीच्या किंमतीवर परिणाम करतात. चांगले रस्ते, विमानतळ आणि इतर आवश्यक सुविधा असलेल्या भागातील जमिनीच्या किंमती जास्त असतात. उदाहरणार्थ, विमानतळ किंवा मुख्य महामार्गांजवळील जमिनीच्या किंमती गावांपेक्षा जास्त असतात.

जमीन खरेदी करताना 'या' गोष्टी महत्वाच्या

जमीन खरेदी करताना, जमिनीची योग्य कागदपत्रे तपासणे महत्त्वाचे आहे. जमिनीच्या मालकीची नोंदणी योग्यरित्या झाली आहे का, हे पाहणे आवश्यक आहे. तसेच, जमिनीवर कोणतेही कायदेशीर वाद नाहीत याची खात्री करणे आवश्यक आहे. जमीन खरेदी करण्यापूर्वी, स्थानिक जमीन दरांची माहिती घेणे आणि तज्ञांचा सल्ला घेणे महत्त्वाचे ठरते यामुळे तुम्हाला योग्य निर्णय घेण्यास मदत होईल. गोव्यात जमीन खरेदी करणे ही एक मोठी गुंतवणूक आहे, त्यामुळे काळजीपूर्वक योजना आखणे आवश्यक ठरतं.