Lala Ki Basti Demolition: सावंत सरकारचा बुलडोझर; 'लाला की बस्ती'तील 25 अनधिकृत बांधकामे जमीनदोस्त

थिवी: राज्यातील अवैध बांधकामे करणाऱ्यांची गय करणार नाही, असा मुख्यमंत्री डॉ. प्रमोद सावंत यांनी इशारा दिला होता. मात्र, अवैध झोपडपट्टी, बस्तीवर कारवाई होणार का?, असा प्रश्न गोमंतकीयांना पडला होता. मंगळवारी (१५ एप्रिल) थिवी येथील कोमुनिदाद जमिनीतील बहुचर्चित लाला की बस्ती या झोपडपट्टीतील २५ अनधिकृत बांधकामे तथा घरे प्रशासनाने जमीनदोस्त केली.

अवचितवाडो-थिवी येथील 'लाला की बस्ती' बहुचर्चित झोपडपट्टीतील घरांवर उत्तर गोवा जिल्हा प्रशासनाने मंगळवारी (१५ एप्रिल) सकाळी ९.३० वाजता बुलडोझर चालवला. सदर बस्तीमध्ये परप्रांतीय मजुरांचे मोठ्या प्रमाणात वास्तव्य होते. मार्चमध्येच या बांधकामांवर कारवाई होण्याची शक्यता वर्तवली जात होती.

मात्र, काही कारणांनी ती कारवाई रखडली होती. या बस्तीमध्ये बहुसंख्येने अल्पसंख्याक समाजातील लोक वास्तव्य करून आहेत. त्यांचा धार्मिक उत्सव मार्चमध्ये होता. त्यामुळे कारवाई पुढे ढकलण्यात आली होती, असे सूत्रांनी सांगितले

पंचायतीकडून परवानगी कशी?

'लाला की बस्ती' मधील ४५ घरांच्या बांधकामांना परवानगी कशी काय देण्यात आली, असा प्रश्न येथील 'लाला' म्हणून प्रसिद्ध असलेल्या लाला बेपारी यांनी उपस्थित केला आहे. लाला हे माजी सरपंच आहेत. "आपल्या कार्यकाळात या बांधकामांना परवानगी देण्यात आली नव्हती."

"मी सरपंच नसताना या घरांच्या बाधकामांना पंचायतीने परवानगी दिली. या गरिब कुटुंबांना वीज आणि पाण्याच्या कनेक्शनसाठी मात्र मी मदत केली होती, असेही कुळ असलेल्या बेपाारी यांनी सांगितले. ज्यांची घरे पाडण्यात आली आहेत त्यांनी आता स्थानिक आमदारांकडे न्याय मागावा. माझ्याकडे हे लोक आले होते मात्र मी त्यांना कोणतीही मदत करु शकत नाही", असेही त्यांनी स्पष्ट केले.

पोलिस छावणीचे स्वरूप

उच्च न्यायालयाच्या आदेशानुसार जिल्हा प्रशासनाचे अधिकारी मामलेदार तसेच पोलिस कर्मचारी, पंचायतीचे कर्मचारी आज सकाळी ९ वाजण्याच्या सुमारास थिवी येथील 'लाला की बस्ती' परिसरात दाखल झाले. कोलवाळ पोलिसांनी परिसरात फौजफाटा तैनात केल्याने परिसराला पोलिस छावणीचे स्वरुप आले होते. पोलिस बंदोबस्तात सकाळी ९.३० वाजता कारवाईला प्रारंभ करण्यात आला.