Korgao: ज्येष्ठ महिलेच्या बागायतीत घुसून 30 पोफळी, 2 कवाथे कापले! कोरगावातील दुर्दैवी प्रकार

पेडणे: गावडेवाडा-कोरगाव येथे रविवारी (ता.१२) रात्री सावित्री गावडे या वृद्ध महिलेच्या मालकीच्या बागायतीमधील पोफळी व कवाथे अज्ञात व्यक्तींनी कापून टाकले. त्यात ३० पोफळी व दोन कवाथ्यांचा समावेश आहे. यामुळे सुमारे ३० हजार रुपयांचे नुकसान झाले आहे.

सावित्री गावडे या आपल्या मुलीसह राहतात. सुमारे दहा वर्षे मेहनत करून त्यांनी पोफळी व कवाथे लावले होते. आपले कुणाशीही वैर नसताना कुणी हे कृत्य का केले हेच आपणाला कळत नाही, असे दु:खी होऊन सावित्री गावडे यांनी सांगितले.

पेडणे पोलिसांत नोंदविली तक्रार

याप्रकरणी सावित्री गावडे यांचा नातू कल्पेश कृष्णा नाईक यांनी पेडणे पोलिस ठाण्यात अज्ञात व्यक्तींविरुद्ध तक्रार नोंदवली आहे. या भागात अधूनमधून भुरट्या चोऱ्या वगैरे होतात. या परिसरात रात्रीच्यावेळी पोलिस गस्त ठेवावी, अशी मागणी या भागातील नागरिकांनी केली आहे.