Khandola Temple Theft : खांडोळा गणेश मंदिरातील चोरीचा तब्बल तीन महिन्यांनी लागला छडा

Khandola Temple Theft : फोंडा तालुक्यात असलेल्या खांडोळा महागणपती देवस्थान चोरी प्रकरणाचा अखेर उलगडा झाला आहे. तब्बल तीन महिन्यांनी चोरीचा छडा लावण्यात फोंडा पोलिसांना यश आलं आहे. संतोषकुमार परमानंद दास (वय 42 रा.ओडिशा) असं मुख्य आरोपीचं नाव असून त्याला कोर्टासमोर हजर केलं जाणार आहे.

आरोपी संतोषकुमारला पणजी पोलिसांनी अटक केली होती. यानंतर त्याची सखोल चौकशी केली असता त्याने फोंडा पोलिस स्थानकाच्या हद्दीत खांडोळा येथे गेल्या 17 ऑगस्ट रोजी महागणपती देवस्थानात चोरी केल्याची कबुली दिली. फोंडा पोलिसांनी याप्रकरणात आणखी कुणाचा सहभाग आहे का याचाही शोध घेण्यास सुरुवात केली आहे. आरोपी संतोषकुमारला रिमांडसाठी पोलिसांनी कोर्टापुढे हजर करण्यात केलं आहे.

खांडोळा येथील प्राचीन श्री गणेश मंदिरावर 17 ऑगस्ट रोजी मध्यरात्री दरोडा खालून मंदिरातील लाखो रुपयांचा ऐवज चोरट्यांनी लंपास केला होता. मूर्तींची प्रभावळ, मुकुट, हात, एका पायाचे पाऊल, अक्षयपात्र, सूर्य, चंद्र प्रतिमा, रथाचे काही साहित्याही घेऊन चोरट्ये पसार झाले. ही घटना मध्यरात्री घडली होती. 5 ते 10 लाखांचा मुद्देमाल चोरी झाल्याची शक्यता वर्तवली जात होती. अखेर तीन महिन्यांनी पोलिसांनी याप्रकरणाचा छडा लावत आरोपीच्या मुसक्या आवळल्या आहेत.

चोरट्यांनी मंदिराच्या मुख्य दरवाजाच्या कड्या तोडून आतील सीसीटीव्ही यंत्रणा निकामी केली. त्यानंतर त्यांनी मंदिरातील मौल्यवान सोने, चांदीचे दागिणे व इतर मूर्तींचे सजावट साहित्यांची चोरी केली. मंदिराचा संग्राह्य रुम (स्टोररूम) फोडून तेथील बरेच साहित्य उचलले . तर काही साहित्य मंदिराच्या बाहेर फेकून दिले.

चोरट्यांना मुख्य दरवाजा फोडून ते आत गेले असून बाहेर पडताना दुसरा दरवाजा तोडून बाहेर आले. उत्तरेकडील दरवाजातून ते बाहेर पडले असून उत्तरेकडील फाटकाजवळ दोन कळशा, चौरंग आणि काही साहित्य, फंड पेटीतील रक्कम टाकून चोरटे पसार झाल्याचे तपासात दिसून आले होते.