करासवाडा छत्रपती शिवरायांच्या पुतळा विटंबणा प्रकरणी पोलिसांना मोठे यश, संशयितांनी दिली महत्वाची माहिती

Karaswada Chhatrapati Shivaji Maharaj statue Desecration: करासवाडा- आकय येथील येथे छत्रपती शिवाजी महाराजांच्या पुतळ्याची अज्ञातांनी विटंबना केल्याचा प्रकार 14 ऑगस्ट रोजी उघडकीस आला. याप्रकरणी पोलिसांनी तीन संशयितांना अटक केली होती. संशयितांकडे चौकशी दरम्यान पोलिसांच्या हाती महत्वाची माहिती लागली आहे.

शिवरायांच्या पुतळ्याची विटंबणा केल्याप्रकरणी म्हापसा पोलिसांनी नायजेल फॉन्सेका (41, आकय), आलेक्स फर्नांडिस (51, आकय), लॉरेन्स मेंडीस (40, थिवी) या तिघांना 6 दिवसांची पोलीस कोठडी देण्यात आली आहे. पोलिसांनी संशयितांची चौकशी असता त्यांनीच हा गुन्हा केल्याचे कबुल केले आहे.

संशयितांनी गुन्हा करताना वापरलेला दगड आणि महाराजांच्या पुतळ्याचा तुटलेला चेहरा देखील पोलिसांना मिळाला आहे. तसेच, घटना घडली त्यावेळच्या प्रत्यक्षदर्शीचा देखील जबाब नोंदवून घेण्यात आला आहे. पोलीस उपनिरीक्षक यशवंत मांद्रेकर याप्रकरणाचा पुढील तपास करीत आहेत.

सोमवारी छत्रपती शिवरायांच्या पुतळ्याची विटंबणा केल्याचा प्रकार उघडकीस आला, त्यानंतर शिवप्रेमींनी आक्रमक भूमिका घेत दोषींवर लवकरात लवकर कारवाई करण्याची मागणी केली होती. पोलिसांनी याप्रकरणात तिघांना अटक केली.

दरम्यान, शिवप्रेमींनी संयम बाळगून तसेच एकतेचे प्रतीक दाखवत त्याच दिवशी संध्याकाळी सिंहासनाधिष्ठीत नवीन पुतळ्याची प्रतिष्ठापना केली. ख्रिस्‍तीधर्मीय आमदार कार्लुस फेरेरा यांनी शिवरायांच्‍या पुतळ्याला पुष्‍पहार अर्पण करून दुग्‍धाभिषेकही केला.