Goa Culture: पिळगाव येथील कळसोत्सव उत्साहात; शुक्रवारी मध्यरात्री सांगता

Goa Culture: अग्निदिव्य आदी पारंपरिक कार्यक्रम आणि शेकडो भक्तगणांच्या साक्षीत पिळगावची ग्रामदेवता श्री शांतादुर्गा देवीचा वार्षिक कळस उत्सव शुक्रवारी मध्यरात्री मोठ्या भक्तिभावाने उत्साहात साजरा करण्यात आला. तीन दिवस साजरा करण्यात आलेल्या कळसोत्सवाची शुक्रवारी मध्यरात्री सांगता झाली.

चैत्र शुद्ध प्रतिपदा अर्थात गुढी पाडव्याच्या दिवशी श्री देवी शांतादुर्गेचा कळस आपल्या भक्तांच्या घरी जात असतो. गावकर मंडळी कळस घेऊन ग्रामस्थांच्या घरात गेल्यानंतर प्रत्येक घरात कळसाचे विधिवत पूजन आदी सेवा करण्यात येते.

सुहासिनी यावेळी देवीची ओटी भरतात. पूर्वीच्या काळी पाडव्या दिवशीच रात्रौ कळस पुन्हा मंदिरात येत असे. परंतु आता लोकवस्ती वाढल्यामुळे कळस पुन्हा मंदिरात पोचायला तीन दिवस लागतात.

शुक्रवारी (ता.24) गिमोणे येथील प्रभु रामचंद्र मंदिर आणि पांडव कालीन चंद्र सूर्य (चांद, सूर्य) प्रतिमा कोरलेल्या पाषाणावर विधिवत पूजन झाल्यानंतर रात्री उशिरा पारंपरिक वाटेने कलशाचे मंदिरात आगमन झाले. त्याठिकाणी मध्यरात्री होमकुंड उत्सव साजरा करण्यात आला. भक्तगणांसह देवीच्या कलशासह अवसारी मोडाने वाजतगाजत अग्निदिव्य केल्यानंतर पारंपरिक पद्धतीने या उत्सवाची सांगता झाली.