Kala Academy: एक नया पैसा न देता 'कला अकादमी'ची दुरुस्ती करणार, कंत्राटदार 'ब्लॅकलिस्ट'मध्ये; मुख्‍यमंत्री ॲक्शन मोडवर

पणजी: कला अकादमी नूतनीकरणात राहिलेल्‍या त्रुटी दूर करण्‍यासाठी योग्य ती पावले उचलण्‍यात आली आहेत. ज्‍या त्रुटी आहेत, त्‍या संबंधित ठेकेदाराकडूनच दूर करण्‍यात येतील. काम पूर्ण झाल्‍यानंतर त्‍याला ‘ब्‍लॅकलिस्‍ट’मध्‍ये टाकण्‍यात येईल, अशी माहिती मुख्‍यमंत्री डॉ. प्रमोद सावंत यांनी दिली.

पणजी येथे पत्रकारांनी त्‍यांना कला अकादमीच्या नूतनीकरणाविषयी विचारले असता ते म्‍हणाले, टास्‍क फोर्सच्‍या शिफारशींप्रमाणे चुकीच्‍या पद्धतीने झालेली कामे दुरुस्‍त करण्यात येतील. ज्‍या काही नव्‍या बाबी कराव्‍या लागतील, त्‍यासाठी टेंडर काढण्‍यात येईल. झालेल्‍या चुका निस्‍तरण्‍याची कामे ‘त्‍याच’ कंत्राटदाराकडून एक नवा पैसाही न देता करून घेण्‍यात येतील, असेही मुख्‍यमंत्र्यांनी यावेळी ठणकावून सांगितले.

हे महत्त्वाचे प्रश्‍न अनुत्तरित

1 कंत्राटदाराने केलेल्या निकृष्ट कामांची चौकशी होणार का?

2 कंत्राटदारावर काळ्या यादी व्यतिरिक्त काहीच कारवाई नाही?

3 कामावर देखरेख ठेवणारे सरकारी अभियंते काय करत होते?

4 केवळ बिल अदा न करून कंत्राटदाराला मोकळीक?

5 कंत्राटदाराला जबाबदारीमुक्त केल्याने पुढील देखभाल दुरुस्ती कोण करेल?

6 आताच्या कामांची हमी कोण

कला अकादमीचे निकृष्‍ट दर्जाचे काम करणाऱ्या ठेकेदाराला काळ्या यादीत टाकणार, असे मुख्‍यमंत्री सावंत यांनी वक्‍तव्‍य केले आहे, त्‍याचे गोवा फॉरवर्डचे अध्‍यक्ष विजय सरदेसाई यांनी स्‍वागत केले आहे. मात्र, निविदा न काढता अशा ठेकेदाराला या कामासाठी कुणी नेमले आणि ही नेमणूक करणाऱ्या सरकारी अधिकाऱ्यावर सरकार काय कारवाई करेल, याचे स्‍पष्‍टीकरण मुख्‍यमंत्र्यांनी द्यावे.