Goa Accident: 'तो' चालक होता दारूच्या नशेत! पत्रकार कार्व्हालो मृत्यू प्रकरणी गुन्हा नोंद; संशयिताची जामिनावर सुटका

कुडचडे: कुडचडे येथील ज्येष्ठ पत्रकार पॉल कार्व्हालो (६०) यांच्या अपघाती मृत्यूस कारणीभूत ठरलेल्या फोंडा येथील पाटबंधारे खात्यात अभियंता म्हणून काम करणाऱ्या एकनाथ गावडे (४३), रा. केरी-फोंडा याला कुडचडे पोलिसांनी अटक केली होती. त्यानंतर त्याला केपे येथील सत्र न्यायालयात हजर करण्यात आले असता न्यायालयाने ५० हजार रुपयांच्या जामिनावर त्याची सुटका केली.

ही दुर्दैवी घटना बुधवारी दुपारी घडली. पॉल कार्व्हालो हे आपल्या (जीए ०२,एस ५०१०)या प्लेजर दुचाकीवरून घरी जात असताना त्यांच्या मागील दिशेने वेगात येणाऱ्या टोयोटा (जीए-०५, एफ ३४४९) या चारचाकी वाहनाने त्यांच्या दुचाकीला जोरदार धडक दिली. धडक इतकी जोरदार होती की, कार्व्हालो सुमारे दहा मीटर दूर फेकले गेले. अपघातात त्यांचे हेल्मेटही दूर जाऊन पडले आणि त्यांच्या डोक्याला गंभीर दुखापत झाली.

जखमी अवस्थेत त्यांना प्रथम कुडचडे उपजिल्हा रुग्णालयात दाखल करण्यात आले. त्यानंतर पुढील उपचारासाठी मडगाव येथील जिल्हा रुग्णालयात हलविण्यात आले. प्रकृती अधिक गंभीर झाल्याने त्यांना बांबोळी येथील गोवा मेडिकल कॉलेज रुग्णालयात दाखल करण्यात आले. मात्र उपचार सुरू असताना दोन दिवसांनी, शुक्रवारी दुपारी त्यांचे निधन झाले.

अपघाताच्या वेळी चारचाकी वाहन संशयित अभियंता एकनाथ गावडे चालवत होते. पोलिस तपासात ते दारूच्या नशेत वाहन चालवत असल्याचे निष्पन्न झाले. त्यांनी एका अन्य वाहनाला ओव्हरटेक करताना नियंत्रण गमावून कार्व्हालो यांच्या दुचाकीला धडक दिल्याचे तपासात समोर आले आहे. या प्रकरणी कुडचडे पोलिसांनी एकनाथ गावडे यांच्याविरुद्ध भारतीय न्याय संहिता २०२३ अंतर्गत कलम १०५, २८१, १२५(डी) तसेच कलम १८५ अन्वये गुन्हा नोंदवून अटक केली होती.