Goa Drug Case: झारखंड-गोवा ड्रग्‍स कनेक्‍शन; 4.90 लाखांच्या गांजासह 21 वर्षीय तरुण अटकेत

पणजी: ड्रग्स तस्करी आणि ड्रग्स विक्रेत्यांविरोधात गेल्या काही दिवसांपासून अमली पदार्थविरोधी कक्षाने (एएनसी) रात्रीच्या वेळी गस्त वाढवून गेल्या दहा दिवसांत लागोपाठ तीन ठिकाणी छापे टाकत कडक कारवाई केली आहे.

गोवा आणि झारखंड येथील आंतरराज्य ड्रग्स माफियांचा पर्दाफाश केला आहे. याच मोहिमेचा भाग म्हणून थिवी रेल्वे स्थानकाबाहेर सापळा रचून २१ वर्षीय झारखंडच्या हिमांशू लालमणी सिंग याला अटक केली. त्याच्याकडून ४.९० लाखांचा गांजा जप्त केल्याची माहिती पोलिस उपअधीक्षक नेर्लोन अल्बुकर्क यांनी दिली.

मानवी बुद्धिमत्ता आणि तांत्रिक देखरेखीच्या आधारे एएनसीने मंगळवारी (१ एप्रिल) संध्याकाळी थिवी रेल्वे स्थानकाबाहेर सापळा रचून ही कारवाई केली.

झारखंड आणि गोवा यादरम्यान अशाच प्रकारे आणखी एका आंतरराज्यीय गांजा तस्करी रॅकेट होते, ज्यामध्ये एका गोव्यातील पुरवठादार आणि झारखंडच्या दोघा वाहतूकदारांना १३ किलो गांजासह अटक केली होती.

एएनसीने झारखंडमधील पोलिसांच्या मदतीने झारखंडहून गोव्यात गांजा आणणाऱ्या मुख्य पुरवठादारालाही अटक केली होती. मिळालेल्या माहितीनुसार, एएनसी तसेच जिल्हा पोलिस व क्राईम ब्रँचने ड्रग्ससंदर्भातील सुमारे ४५ प्रकरणे नोंद केली आहेत.