जे. पी. नड्डा उद्या गोवा दौऱ्यावर

पणजी: भारतीय जनता पक्षाचे (BJP) राष्ट्रीय अध्यक्ष जे. पी. नड्डा (J.P. Nadda) हे 21 व 22 डिसेंबरला दोन दिवसांच्या गोवा (Goa) दौऱ्यावर येत आहेत. 21 रोजी संध्याकाळी 6.30 वाजता ते केपे येथे जाहीर सभेत भाजप कार्यकर्त्यांना मार्गदर्शन करणार आहेत व 22 रोजी ते उत्तर गोवा दौरा करणार आहेत. त्यांच्या या दौऱ्यात राज्यातील निवडणुकीसंदर्भातचाही (Goa Election) आढावा घेणार आहेत. त्यांच्या या दौऱ्यात पक्षाचे अनेक महत्त्वाचे निर्णय होण्याची शक्यता आहे.

गोव्यातील पंतप्रधान नरेंद्र मोदी (Narendra Modi) यांच्या दौऱ्यानंतर आता राज्यातील कोणत्याही क्षणी विधानसभा निवडणुकीची तारीख जाहीर होण्याची शक्यता नाकारता येत नाही. त्यामुळे अध्यक्ष नड्डा हे पक्षाच्या विविध समितींच्या पदाधिकाऱ्यांशी चर्चा करून आढावा घेणार आहेत. हल्लीच गोवा निवडणूक प्रभारी देवेंद्र फडणवीस (Devendra Fadanvis) व राष्ट्रीय सरचिटणीस बी. एल. संतोष हे गोव्यात येऊन गेले. निवडणूक जाहीरनामा समिती तसेच निवडणूक व्यवस्थापन समितीच्या त्यांनी बैठका घेतल्या होत्या तसेच पदाधिकाऱ्यांना कामाची गती वाढवण्याच्या सूचना केल्या होत्या.

दरम्यान, भाजपने राज्यात कोणत्याही परिस्थिती पुन्हा सत्ता स्थापन करण्यासाठी मतदारसंघामध्ये लोकांचा अधिक पाठिंबा असलेल्या उमेदवारांना भाजपमध्ये ओढण्यास सुरवात केली आहे. आतापर्यंत त्यांच्या गळाला जयेश साळगावकर, रोहन खंवटे व रवी नाईक हे तिघे लागले आहेत. मगोच्या निश्‍चित उमेदवारांनाही त्यांनी गळ घालण्यास सुरवात केली आहे. त्यातील एक राजी झाला आहे, तर पेडण्यात तूर्त भाजपला यश आलेले नाही.