IFFI Goa 2023 : इफ्फीत पहिल्या दिवशी पत्रकारांच्या ओळखपत्रांचा घोळ!

IFFI Goa 2023 : पणजी, राज्यात १९ वर्षे होत असलेल्या भारतीय आंतरराष्ट्रीय चित्रपट महोत्सवाचे वार्तांकन करण्यासाठी विविध राज्यांतून पत्रकार येतात. त्यात विविध भाषेतील वर्तमानपत्रांचे चित्रपट किंवा सांस्कृतिक क्षेत्राचे वार्तांकन करणाऱ्या पत्रकारांचा समावेश आहे.

परंतु केंद्रीय पत्रसूचना कार्यालयाकडून या पत्रकारांना ओळखपत्र वेळेत न देण्याची प्रक्रिया अद्यापि सुटसुटीत होण्याचे काही चित्र दिसत नाही.

मुंबईच्या पत्रसूचना कार्यालयाच्या अधिकाऱ्यांकडे या पत्रकारांनी विचारणा केली. गेली २७ वर्षे एक महिला पत्रकार इफ्फीचे वार्तांकन करीत आल्या आहेत. त्यांनी पत्रसूचना कार्यालयाच्या अधिकाऱ्यांकडे वेळेत ओळखपत्र मिळत नाहीत, याबद्दल तक्रार केली.

आपण थेट केंद्रीय माहिती अधिकारी अनुराग ठाकूर यांना विचारणा करू, असे सांगितल्यांनंतर त्या महिला पत्रकाराची मनधरणी करण्याशिवाय त्या अधिकाऱ्यांकडे पर्याय राहिला नाही.

दरम्यान, पत्रकारांची ओळखपत्र देण्यास या तारखेपासून अमुक वेळेपर्यंत सुरू होणार असल्याचा संदेश व्हॉट्सॲप ग्रुपवर टाकण्यात आला. ओळखपत्रे दिली; पण पत्रकारांना पुन्हा चित्रपट कॅटलॉगचे किट घेण्यासाठी काउंटरकडे जावे लागले.

अशी कुठली तांत्रिक अडचण?

यावेळी चित्रपट समीक्षक कोल्हापूरचे अनमोल कोठाडिया यांनाही असाच अनुभव आला. त्यांचेही ओळखपत्र मिळाले नसल्याने त्यांनी पत्रसूचना कार्यालयाच्या अधिकाऱ्यांकडे विचारणा केली. परंतु त्यांनाही तांत्रिक अडचण आल्याचे सांगण्यात आले.

कोठाडिया यांच्याप्रमाणे इतर पत्रकारांनीही आम्ही आमचा प्रश्‍न कोणाकडे मांडणार, अशी विचारणा अधिकाऱ्यांना केली.

चुकीचा संदेश

पत्रकारांना ओळखपत्रे वाटण्यामध्ये गोंधळ उडाल्याने पत्रकार नाराज झाले. अनेक पत्रकारांनी याबद्दल संबंधित अधिकाऱ्यांना विचारणाही केली. पण त्यांना समाधानकारक उत्तरे देता आली नाहीत. अशा गोंधळामुळे या आयोजनातील त्रुटी सर्वांसमोर आल्या. यातून एक चुकीचा संदेश मात्र सर्वदूर पसरला. आणि तशी चर्चाही सुरू होती.

गोंधळात गोंधळ

इफ्फीत पहिल्याच दिवशी मोठ्या प्रमाणात नोंदणी करण्यासाठी आलेल्या प्रतिनिधींना गोंधळाचा सामना करावा लागला. इफ्फीत कोणते कार्यक्रम कधी असतील याची माहिती पुस्तिका अनेकांना देण्यात आली नाही.

इफ्फी आयोजकांनी बुकिंग तसेच इतर बाबींसाठी संकेतस्थळ अथवा इफ्फी ॲपची निर्मिती करण्यात आली आहे; पंरतु काही नवख्या तसेच तंत्रज्ञान सुरळीतपणे हाताळता येत नसलेल्या प्रतिनिधींना या प्रक्रियेचा नाहक त्रास होत आहे.