IFFI Goa 2023: बॉलिवूड निर्मात्यांऐवजी ‘इफ्फी’त दुर्लक्षितांना स्थान द्या!

IFFI Goa 2023: बॉलीवूडमधील अभिनेते सदोदित प्रसिद्धीच्या झोतात असतात. त्यांच्याकडे प्रसिद्धीसाठी विविध माध्यमे उपलब्ध आहेत. करण जोहर वगैरे अभिनेत्यांना चित्रपटाच्या प्रमोशनसाठी ‘इफ्फी’ची आवश्‍यकता का भासली? सरकारने देशातील करदात्यांच्या पैशाचा योग्य वापर करत दर्जेदार चित्रपट तसेच दुर्लक्षितांना ‘इफ्फी’त स्थान देणे गरजेचे आहे.

असे प्रतिपादन माहितीपट आणि लघुपट ज्युरीचे अध्यक्ष अरविंद सिन्हा यांनी केले. यंदा लघुपट आणि माहितीपट गटात लघुपट अतिशय कमी आले आहेत. तरूणाईला झटपट काम करायचे आहे, त्यामुळे माहितीपटांच्या संख्येत वाढ झाली आहे. मात्र, दर्जा घटल्याचेही त्यांनी सांगितले.

गोवा मनोरंजन सोसायटीच्या आवारात आयोजित पत्रकार परिषदेत ते बोलत होते. ते चित्रपट निर्माते करण जोहर यांनी चित्रपटाच्या प्रसिद्धीसाठी ‘इफ्फी’च्या व्यासपीठाचा वापर केल्याच्या पार्श्‍वभूमीवर ते बोलत होते. यावेळी ज्युरी सदस्य पौशाली गांगुली, बॉबी वाहमाम, अरविंद पांडे व इतर सदस्य उपस्थित होते.

तरूणांना भावणारे माहितीपट यावेत !

आजच्या तरूणाईला आवडणारे माहितीपट बनविणे आवश्यक आहे. काही काळ माहितीपट पाहिल्यानंतर कंटाळा येता कामा नये. येत्या काळात असे माहितीपट निर्माण होणे आवश्यक आहेत, जे तरूणाईला आकर्षित करतील, असे प्रतिपादन पौशाली गांगुली यांनी केले.