Vasco News : विमानात ‘सिगारेट’ पेटविली; प्रवाशांची त्रेधातिरपीट उडाली

वास्को, सिगारेट ओढण्याची लहर आल्याने एक प्रवासी वॉशरूममध्ये गेला. त्याने काडीपेटीने सिगारेट पेटविली आणि अलार्म वाजल्याने हवेतच असलेल्या विमानातील प्रवाशांमध्ये एकच घबराट पसरली.

विमान दाबोळी विमानतळावर उतरल्यावर त्या प्रवाशाच्या विरोधात दाबोळी विमानतळ पोलिस स्थानकामध्ये तक्रार दाखल करून गुन्हा नोंद करण्यात आला आहे.

हैदराबादहून गोव्याकडे येणाऱ्या इंडिगो विमानातून आंध्र प्रदेशातील गड्डम श्रीनिवास (४०) हा प्रवास करीत होता. विमान हवेतच असताना त्याला सिगारेट ओढण्याची हुक्की आली. तो वॉशरूममध्ये गेला आणि त्याने आपल्याकडील काडीपेटीने सिगारेट पेटविली. त्यामुळे तयार झालेल्या धुरामुळे विमानातील फायर अलार्म वाजू लागला.

त्यानंतर घाबरलेल्या गड्डमने लगबगीने ती सिगारेट विमानातील शौचालयामध्ये टाकली आणि तो बाहेर पळाला. मात्र, धुरामुळे अलार्म वाजल्याने प्रवाशांमध्ये एकच खळबळ उडाली. सर्वजण चिंताग्रस्त बनले. हे विमान दाबोळी विमानतळावर मंगळवारी (ता.२३) रात्री उतरले होते. या प्रकाराबद्दल इंडिगोच्या साहाय्यक व्यवस्थापकांनी दाबोळी विमानतळ पोलिस स्थानकामध्ये बुधवारी सकाळी तक्रार नोंदविली.