Goa Assembly Session: पॅरा ऑलिंपिक संघटना अजूनही संलग्नतेच्या प्रतिक्षेत; क्रीडामंत्री गावडे

पणजी: गोवा पॅरा ऑलिंपिक संघटना अजून क्रीडा खात्याशी संलग्न नाही. त्यांच्याशी बोलणी झाली असून काही कागदपत्रांची पूर्तता होणे बाकी आहे, अशी माहिती क्रीडामंत्री गोविंद गावडे यांनी बुधवारी राज्य विधानसभेत दिली. संघटनेला संलग्नता नसली, तरी विशेष खेळाडूंना सरकार सर्वतोपरी मदत करत असून त्यांच्या प्रशिक्षणाची सोयही करण्यात आल्याचे त्यांनी यावेळी नमूद केले.

पॅरा (विशेष) खेळाडूंच्या स्पेशल ऑलिंपिकसाठी राज्यातील खेळाडूंच्या निवड प्रक्रियेत राज्य सरकारला कोणतीही भूमिका नाही, मात्र निवड झालेल्या खेळाडूला आणि त्याच्यासोबत एका व्यक्तीला जाता यावे यासाठी सारी मदत सरकार करेल, अशी माहितीही क्रीडामंत्री गोविंद गावडे यांनी बुधवारी राज्य विधानसभेत दिली.

साळगावचे आमदार केदार नाईक यांनी याविषयीचा प्रश्न विचारला होता. विशेष खेळाडूंसाठी केवळ प्रशिक्षण शिबिर घेऊन चालणार नाही तर अन्य काही प्रयत्नांची गरज आहे हे सरकार लक्षात घेणार आहे का अशी विचारणा त्यांनी केली.

ते म्हणाले, ‘‘बर्लिन पॅरा (स्पेशल) ऑलिंपिकमध्ये भारताने २०२ पदके जिंकली त्यातील २३ पदके गोमंतकीय खेळाडूंनी जिंकली होती. विशेष खेळाडूंसाठी प्रशिक्षक नेमले पाहिजेत. त्यांच्यासाठी निधीची तरतूद केली पाहिजे. असे करण्यात आम्ही कमी पडत आहोत. विशेष मुलांचा उत्साह वाढवला तर पदकांची संख्या दुप्पट होण्यास वेळ लागणार नाही.’’

मांद्रेचे आमदार जीत आरोलकर म्हणाले, ‘‘पॅरा (स्पेशल) ऑलिंपिक सुरू होण्यास चार महिने राहिले असतानाच राज्यपातळीवर खेळाडूंची निवड तरी झाली आहे का?

आमदार विजय सरदेसाई म्हणाले, ‘‘विशेष खेळाडूंनी तिकीट काढून निधी मागितल्यावर बोर्डिंग पास मागितला जातो तो खरे तर प्रवास करतानाच मिळतो. खेळाडूने बक्षिसे मिळवल्यानंतर त्यांना सरकारकडून दिली जाणारी बक्षिसाची रक्कम अजून मिळालेली नाही. खेळाडूंना किट घेण्यासाठी केवळ दोन हजार रुपये दिले जातात. त्यात केवळ जर्सी घेता येते. विशेष मुलांना स्पर्धेच्या ठिकाणी जाताना एक व्यक्ती सोबत न्यावी लागते त्यासाठी प्रवास खर्चाची तरतूद सरकार करणार आहे का?’’

क्रीडामंत्री म्हणाले, आणखी कोणत्या विशेष विद्यार्थ्याला खेळाबाबत विशेष प्रशिक्षण हवे असल्यास तशी विनंती केलेली नाही. नॅशनल पॅरा चॅम्पियनशिप, पॅरा ऑलिंपिक, नॅशनल पॅरा गेम्स आदी स्पर्धांत विशेष खेळाडूंना सहभागी होण्यासाठी सरकारने मदत केली आहे. त्यांच्या संघटनेला सरकारची मान्यता मिळाल्यावर अनुदानही दिले जाईल.

बक्षीस रक्कम गणेश चतुर्थीपूर्वी

राज्यातील क्रीडा पदक विजेत्यांना अजून राज्य सरकारतर्फे बक्षीस रक्कम देण्यात आलेली नाही. याविषयी क्रीडामंत्री गावडे यांनी सांगितले, की सर्व पदक विजेत्या खेळाडूंची बक्षिसाची रक्कम येत्या गणेश चतुर्थी पूर्वी दिली जाईल.