Green School: देशातील पहिली ग्रीन शाळा गोव्यात सुरू

Green School: राज्यातीलच नव्हे, तर देशातील पहिल्या ग्रीन शाळेचे उदघाटन मुख्यमंत्री डॉ. प्रमोद सावंत यांच्या हस्ते विठ्ठलापूर-साखळी येथे करण्यात आले. पंतप्रधान नरेंद्र मोदी यांच्या नवभारत संकल्पना पूर्ततेसाठी सर्वांनी सहकार्य करावे, असे आवाहन त्यांनी यावेळी केले.

अन्य राज्याच्या तुलनेत गोवा राज्य शिक्षणाच्या बाबतीत आघाडीवर आहे. केजी ते पीजीपर्यंत शिक्षण उपलब्ध असलेला डिचोली हा एकमेव तालुका आहे.

नवीन शिक्षण धोरणाला अनुसरून शाळांनी साधनसुविधा उपलब्ध करून देण्यासाठी सरकार आग्रही आहे. पुढील वर्षापासून नवीन शैक्षणिक धोरणाची अंमलबजावणी करण्यात येईल, असे मुख्यमंत्री सावंत यांनी यावेळी सांगितले.

सुरवातीस मुख्यमंत्री डॉ. प्रमोद सावंत यांनी नामफलकाचे अनावरण आणि फित कापून इमारतीचे उदघाटन केले. नंतर स्वामी विवेकानंद आणि श्री सरस्वती मूर्तीचे अनावरण करण्यात आले. विद्यार्थ्यांनी स्वागतगीत सादर केले.

कल्पना मळीक यांनी प्रास्ताविक केले. स्वाती पूजारी आणि धावस्कर यांनी सूत्रसंचालन केले. या सोहळ्यास अन्य मान्यवर उपस्थित होते.

या सोहळ्यास मयेचे आमदार तथा फलोत्पादन महामंडळाचे अध्यक्ष प्रेमेंद्र शेट, जिल्हा पंचायत सदस्य महेश सावंत, गोवा साधनसुविधा विकास महामंडळाचे व्यवस्थापकीय संचालक हरिश अडकोणकर, कारापूरचे सरपंच दत्तप्रसाद खारकंडे, शिक्षण खात्याचे संचालक शैलेश झिंगडे आदी उपस्थित होते. सरकारच्या पाठिंब्यामुळे अनेक विकासकामे मार्गी लागल्याचे आमदार प्रेमेंद्र शेट म्हणाले.

ग्रीन शाळेची खासियत

• एकूण 14 खोल्या : खर्च 5.29 कोटी रुपये

• विठ्ठल-रखुमाई सरकारी शाळा असे नामकरण

• भविष्यातील विस्तारासाठी आणि इतर उपक्रमांसाठी अत्याधुनिक दुमजली इमारत.

• मराठी माध्यमाचे शिक्षण देणाऱ्या इयत्ता पहिली ते चौथीसाठी प्रत्येकी 2 वर्गखोल्या

• उर्दू माध्यमाचे शिक्षण देण्यासाठी दोन वर्गखोल्या.

• संगीत आणि नृत्य शिक्षणासाठी समर्पित वर्ग खोल्या.

• एक अ‍ॅक्टिव्हिटी रूम, वाचनालय आणि स्पेस थीम ध्यान कक्ष.

• दोन हजार चारशे चौ.मी. जागेत उभारली इमारत.