Indian Market : भारतीय कारागीर बाजार प्रदर्शनाचे मडगावात उद्घाटन

Indian Market : सासष्टी, भारतीय कला व संस्कृती प्रदर्शित करणाऱ्या प्रदर्शनांना प्रोत्साहन द्यावे. रवींद्र भवनमध्ये आजपासून सुरू झालेल्या भारतीय कारागीर बाजार या प्रदर्शनाद्वारे भारतीय कला व संस्कृतीची माहिती मिळते, असे प्रतिपादन सभापती रमेश तवडकर यांनी केले.

प्रदर्शनाचे उदघाटन केल्यावर ते बोलत होते. याप्रसंगी रवींद्र भवनचे अध्यक्ष राजेंद्र तालक, उपाध्यक्ष मनोहर बोरकर, सदस्य सचिव आग्नेल फर्नांडिस उपस्थित होते. या प्रदर्शनात कला, हस्तकला, हातमाग, सौंदर्य प्रसाधने व घरगुती वस्तूंचा समावेश आहे.

स्थानिक कलाकारांना प्रोत्साहन देणे गरजेचे आहे. गोव्यातही कला-कुसरीची कामे करणारे कारागीर आहेत. त्यांनीही अशा प्रदर्शनांमध्ये सहभागी व्हावे, असे त्यांनी सांगितले. गोमंतकीयांनी या प्रदर्शनाला भेट देऊन कारागिरांना प्रोत्साहीत करावे, असे आवाहन तवडकर यांनी केले.

या प्रदर्शनात उत्तर प्रदेश, बिहार, बंगाल, राजस्थान, आंध्र प्रदेश, काश्मीर, तमिळनाडू, गुजरात, महाराष्ट्र येथील कारागिरांचे ६० स्टॉल्स आहेत.