Goa Inquisition: गोव्यात शालेय अभ्यासक्रमात 'इन्क्विझिशन'चा इतिहास समाविष्ट करा; हिंदू जनजागृती समिती

Goa Inquisition History

गोव्यातील 'इन्क्विझिशन'चा इतिहास विद्यार्थ्यांना शिकवला जावा, अशी मागणी हिंदू जनजागृती समितीने गोवा सरकारकडे केली आहे. उत्तरप्रदेशातील योगी सरकार राममंदिराचा इतिहास अभ्यासक्रमात समाविष्ट करु शकते तर गोव्यात का नाही? असा सवाल देखील समितीने उपस्थित केला आहे.

गोव्यात 24 ते 30 जून 2024 या कालावधीत होणार्‍या 12 व्या ‘अखिल भारतीय हिंदू राष्ट्र अधिवेशनाच्या पार्श्वभूमीवर आयोजित पत्रकार परिषदेत दक्षिण गोवा राज्य समन्वयक सत्यविजय नाईक आणि अधिवक्ता शैलेंद्र नाईक बोलत होते.

गोव्यातील भव्य आणि प्राचीन मंदिरांचा इतिहास, पोर्तुगीज काळात झालेला मंदिरांचा विध्वंस, ‘इन्क्विझिशन’द्वारे झालेले अत्याचार, गोमंतकियांनी मंदिरे आणि संस्कृती रक्षणासाठी दिलेला लढा, हा इतिहास का शिकवला जाऊ शकत नाही? गोमंतकाचा सत्य इतिहास विद्यार्थ्यांना शिकवला जावा, अशी राज्य सरकारकडे मागणी आहे, अशी मागणी त्यांनी पत्रकार परिषदेत केली.

पंतप्रधान मोदींनी नुकतेच नालंदा येथे प्राचीन विश्वविद्यालयाच्या जवळ नवीन कॅम्पसचे उद्घाटन केले. उत्तरप्रदेशातील योगी सरकारने राममंदिराचा इतिहास अभ्यासक्रमात समाविष्ट करण्याचा निर्णय घेतला तसाच गोव्यात देखील इन्क्विझिशनचा इतिहास शिकवला जावा, अशी मागणी समितीने केली.