डिचोली, ''मोहल्ला क्लिनिक''च्या धर्तीवर डिचोली बाजारातील व्यापाऱ्यांसह विक्रेते आणि ग्राहकांच्या सेवेसाठी आता दवाखाना (वेलनेस सेंटर) उभारण्यात येणार आहे.
बाजारातील प्रवेशद्वाराच्या कोपऱ्यात हा दवाखाना उभारण्यात येणार आहे. या दवाखान्यात डॉक्टर, परिचारिकेसह प्राथमिक उपचार सेवा उपलब्ध करण्यात येणार आहे.
गुरुवारी (ता.२२) आमदार डॉ. चंद्रकांत शेट्ये यांच्या हस्ते श्रीफळ वाढवून या प्रकल्पाच्या कामाचा शुभारंभ करण्यात आला. केंद्र सरकारच्या योजनेंतर्गत ''जी-सुडा''तर्फे हा दवाखाना उभारण्यात येणार आहे. या प्रकल्पावर ८४ लाख रुपये खर्च येणार आहे.
दवाखाना कामाच्या शुभारंभ सोहळ्याप्रसंगी नगराध्यक्ष कुंदन फळारी, उपनगराध्यक्ष दीपा पळ, नगरसेवक ऍड. अपर्णा फोगेरी, सतीश गावकर, तनुजा गावकर, विजयकुमार नाटेकर, निलेश टोपले, सुखदा तेली, ॲड. रंजना वायंगणकर, पालिकेचे अधिकारी, कर्मचारी रुपेश ठाणेकर आदी उपस्थित होते.
दवाखाना ठरणार वरदान !
बाजारातील व्यापाऱ्यांसह विक्रेते तसेच बाजारहाटीसाठी येणाऱ्या ग्राहकांना हा दवाखाना निश्चितच वरदान ठरणार आहे, असा विश्वास आमदार डॉ. चंद्रकांत शेट्ये यांनी व्यक्त केला.
बाजारातील एखाद्या व्यक्तीला आरोग्याची समस्या उद्भवल्यास, किंवा एखादेवेळी आपत्कालीन घटना घडली आणि एखादा नागरिक जखमी झाला. तर या दवाखान्यात प्राथमिक उपचार करण्यात येणार आहेत, असेही डॉ. शेट्ये यांनी सांगितले. कुंदन फळारी यांनी या दवाखान्यामागील संकल्पना सांगितली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
