सावर्डेत गणेश गावकरांवर पक्षाने ठेवलेला विश्वास सार्थ

केपे: मगो पक्षातून भाजपात दाखल झालेले सावर्डेचे आमदार दीपक प्रभू पाऊसकर यांना अखेरच्या क्षणी उमेदवारी नाकारून माजी आमदार गणेश गावकर यांना दिली होती. पक्षाने गावकर यांच्यावर ठेवलेला विश्वास गावकर यांनी सार्थ ठरवत पाऊसकर यांचा पाच हजार मतांनी पराभव केला. (Ganesh Gaonkar News)

सावर्डे मतदारसंघातून 2017 निवडणुकीत दीपक पाऊसकर यांनी भाजपचे गणेश यांचा पराभव केला होता व नंतर 2019 मध्ये पाऊसकर यांनी भाजपात प्रवेश करून सार्वजनिक बांधकाम खाते पदरात पाडून घेतले होते. (Goa election result 2022 news)

सार्वजनिक बांधकाम खाते मिळूनसुद्धा पाऊसकर मतदारसंघाचा विकास करण्यासाठी बरेच मागे पडले तसेच त्यांनी आपल्या खात्यातील नोकऱ्या विकल्या असा आरोप भाजपचे आमदार बाबुश मोन्सेरात यांनी केल्याने पाऊसकर बरेच अडचणीत आले होते. याच कारणाने त्यांची उमेदवारी गेली होती.

सावर्डे मतदारसंघातून अखेरच्या क्षणी भाजपने उमेदवारी गणेश गावकर यांना दिल्याने अखेर त्यांनी अपक्ष उमेदवार म्हणून निवडणूक लढवली होती. गावकर यांच्या प्रचारात युवकांनी चांगले काम केल्याने आपला विजय झाल्याचे गावकर म्हणाले.