डिचोलीत झेंडू फुलांचे मळे केशरी-पिवळ्या फुलांनी बहरले

डिचोली: यंदा उशिराने का होईना, आता डिचोलीत झेंडू फुलांचे (Marigold flowers) मळे केशरी-पिवळ्या फुलांनी पूर्ण बहरले असून, दिवाळी (Diwali) सणाला स्थानिक मळ्यांनी फुललेली झेंडुंची फुले उपलब्ध होणार आहेत. दसऱ्याला नाही, तरी आता दिवाळीला फूले मिळणार असल्याने शेतकऱ्यांच्या चेहऱ्यावर हास्य उमटले आहे. असंतुलित पावसामुळे यंदा झेंडू फुलांचा बहर लांबणीवर पडला होता. डिचोली विभागीय कृषी कार्यालयाच्या कार्यक्षेत्रात दिवाळीला एक टनहून अधिक झेंडू फूले मिळणार असल्याचा अंदाज आहे.

दसऱ्यात तुडवडा

कृषी खात्याच्या 'आत्मा' योजनेंतर्गत यंदा डिचोलीत 'झेंडू'ची दुप्पट लागवड करण्यात आली असली, तरी गेल्या महिन्यात साजरा झालेल्या दसरा सणावेळी 'झेंडू'चे मळे फुलांनी बहरलेले नव्हते. त्यामुळे यंदा ऐन दसरा सणात स्थानिक जमिनीत फुललेली झेंडूची फुले दुर्मिळ झाली होती. परिणामी डिचोलीवासियांना राज्याबाहेरून येणाऱ्या झेंडू फुलांवरच अवलंबून रहावे लागले होते.

अडीज हेक्टर क्षेत्रफळात लागवड

कृषी खात्याच्या सहकार्याने यंदा बोर्डेसह साळ, पिळगाव, मये आदी भागात मिळून डिचोलीत 25 हजार चौरस मीटर अर्थातच अडीज हेक्टर जमीन झेंडू लागवडीखाली आली आहे. जवळपास 30 शेतकऱ्यांनी (farmers) ही लागवड केली आहे. यंदा स्थानिक नर्सरीतून झेंडूची रोपटी शेतकऱ्यांना उपलब्ध करून देण्यात आली होती. मात्र असंतुलित पाऊस आणि लागवडीस झालेल्या उशिरामुळे फुलांच्या बहरावर परिणाम झाला आणि फूले फुलण्याची प्रक्रिया लांबणीवर पडली. अशी माहिती कृषी खात्याकडून उपलब्ध झाली आहे.

बहर समाधानकारक

यंदा 'झेंडू'ची लागवड जवळपास एक महिना उशिराने झाली आहे. त्यामुळे फुले फुलण्याची प्रक्रिया लांबणीवर पडली गेल्या वर्षी ऐन दसरोत्सवात मळे झेंडू फुलांनी बहरले होते. उशिराने का असेना, आता झेंडू फुलांचा बहर समाधानकारक आहे.

निलिमा गावस, विभागीय कृषी अधिकारी यांचे बाजारपेठेसाठी प्रयत्न

झेंडू फुलांना बाजारपेठ मिळावी.म्हणून गोवा फलोत्पादन महामंडळाला प्रस्ताव देण्यात आला आहे. अजून सकारात्मक प्रतिसाद मिळालेला नाही. तूर्तास बाजारात फुले विकणाऱ्या अश्वेता खांबल (पळ), तांत्रिक व्यवस्थापक यांनी विक्रेत्यांचे संपर्क नंबर शेतकऱ्यांना दिलेले आहेत.