ED Raid: पणजी, मुंबईसह काही शहरांमध्‍ये ईडीची छापेमारी! के. सी. वीरेंद्र केंद्रस्‍थानी, 110 कोटींचा मुद्देमाल जप्‍त

पणजी: अवैध ऑनलाइन बेटिंग आणि त्यातून होणारे मनी लॉन्डरिंग उघडकीस आणत अंमलबजावणी संचालनालयाने (ईडी) पणजीसह अनेक शहरांत छापे टाकले. या छाप्‍यांमागे मुख्य सूत्रधार के. सी. वीरेंद्र व त्याचे सहकारी असून विविध गेमिंग वेबसाइट्सच्या माध्यमातून कोट्यवधी रुपये वळविल्याचा त्यांच्यावर आरोप आहे.

ईडीच्या बेंगळुरू विभाग कार्यालयाने २ सप्टेंबर २०२५ रोजी बेंगळुरू व चल्लकेरे येथे धाडी टाकल्या. ईडीने दिलेल्या माहितीनुसार तपास अद्याप सुरू असून, पुढील काही दिवसांत अधिक तपशील जाहीर होणार आहेत. दरम्यान, के. सी. वीरेंद्रची ईडी कोठडी ७ दिवस वाढविण्यात आली आहे.

पीएमएलए २००२ अंतर्गत झालेल्या या कारवाईत तब्बल ५५ कोटींच्या किमतीच्या उच्च श्रेणीतील गाड्या (त्यात मर्सिडीज बेंझ कारचा समावेश), ४०.६९ कोटी रुपयांची रोकड, तसेच बँक व डिमॅट खात्यांतील मिळून १४.४६ कोटी रुपयांची रक्कम गोठविण्यात आली आहे. या पहिल्या टप्प्यातील जप्तीची एकूण किंमत सुमारे ११० कोटी रुपये आहे.

सोन्याचे दागिने, १० किलो चांदी जप्त

पणजी, गंगटोक, जोधपूर, हुबळी आणि मुंबई येथे झालेल्या धाडीत १२ कोटींची रोकड, ६ कोटींचे सोन्याचे दागिने आणि १० किलो चांदी जप्त करण्यात आली आहे.

या अतिरिक्त कारवाईची एकूण किंमत १८ कोटींपेक्षा अधिक असल्याची माहिती ईडीने दिली आहे. तपासात काही निधी दुबईतील शेल कंपन्यांमार्फत वळविला गेल्याची माहिती ईडीने दिली आहे.

यामध्ये कॅस्टल रॉक प्रोजेक्ट मॅनेजमेंट सर्व्हिस आणि लस्कस कोर प्रोजेक्ट मॅनेजमेंट सर्व्हिस या कंपन्यांचा समावेश असून, त्या के. सी. वीरेंद्रने के. सी. तिप्पेस्वामी, पृथ्वी एन. राज, अनिल गौडा व इतरांच्या भागीदारीत स्थापन केल्याचे उघड झाले आहे.