Goa Assembly: वायनाडमधील दुर्घटनेमुळे सर्वांचे डोळे उघडले; मुख्यमंत्री सावध

पणजी: राज्यात यापुढे बेकायदा डोंगर कापणी होऊ देणार नाही, अशी ग्वाही मुख्यमंत्री डॉ. प्रमोद सावंत यांनी आज विधानसभेत दिली. वायनाड येथील भूस्खलन हे सगळ्यांचे डोळे उघडणारे आहे. ‘इस्त्रो’च्या अहवालात वायनाडसोबत गोव्याचाही उल्लेख होता, असे ते म्हणाले. ते म्हणाले की, मी आपत्ती व्यवस्थापन प्राधिकरणाला सूचना दिल्या आहेत की, भूस्खलन प्रवण क्षेत्रांमध्ये कामे होऊ नयेत.

पाड्डीत डोंगर कापून उभारले सभागृह

या विषयावरील चर्चेत सहभागी होताना युरी आलेमाव म्हणाले, पाड्डी येथे डोंगर कापून सभागृह बांधले आहे. विशेष म्हणजे, दहा वर्षांपूर्वी मरण पावलेल्या व्यक्तीच्या नावाने असलेल्या अधिकारपत्राच्या आधारे हे सारे केले आहे. मुख्यमंत्र्यांना त्या सभागृहाच्या उदघाटनासाठी निमंत्रित करण्यात येणार आहे. अशा गोष्टींवर सरकार कारवाई करणार नसेल तर डोंगर कापणी थांबणार नाही. सरकारने याकडे राजकीय चष्म्यातून पाहू नये.