Goa Congress: मुख्यमंत्री सावंत यांचे सरकार मृत झाले आहे; डोंगरकापणीवरुन काँग्रेसचा हल्लाबोल

पणजी: राज्यातील बेकायदेशीर डोंगरकापणी खपवून घेतली जाणार नाही, असे मुख्यमंत्री डॉ. प्रमोद सावंत यांनी नुकतेच जाहीर केले. तरीही हे प्रकार थांबलेले नाहीत. धारबांदोडा येथे मोठ्या प्रमाणात डोंगर कापणी होत असल्याच्या प्रकाराने प्रशासन खडबडून जागे झाल्याचा आरोप काँग्रेस प्रदेश उपाध्यक्ष सुनील कवठणकर यांनी केला. काँग्रेस भवनात मंगळवारी झालेल्या पत्रकार परिषदेत ते बोलत होते.

डोंगर कापण्याचे प्रकार तपासण्याची जबाबदारी तलाठ्यांवर सोपवली आहे. केवळ तलाठ्यांवर ही जबाबदारी न सोपवता ती मामलेदार, उपजिल्हाधिकारी, पोलिस अधिकारी यांनाही द्यावी. प्रतापनगर, धुलैय येथे डोंगर कापणीचा प्रकार पुढे आला आहे.

रेईशमागूसचा डोंगर बिल्डरने साफ केला, हे हरितपट्ट्याचे नुकसान नाही तर काय आहे, असा सवाल कवठणकर यांनी केला. बेकायदेशीर डोंगर कापणी ही राज्यासाठी हानिकारक आहे. मुख्यमंत्री सावंत यांचे सरकार मृत झाले आहे, असा आरोप कवठणकर यांनी केला.