Nawazuddin Siddiqui: 'इफ्फी'मध्ये अयोग्य लोकांना बोलवू नका; कलात्मक चित्रपट बनवणाऱ्यांना आमंत्रण द्या!

Nawazuddin Siddiqui in IFFI 2023: गोव्यात 54 व्या भारतीय आंतरराष्ट्रीय चित्रपट महोत्सव मध्यावर आला आला आहे. काही दिवसांपुर्वीच या महोत्सवाच्या उद्घाटन सोहळ्यात निर्माता-दिग्दर्शक करन जोहरला पहिल्या रांगेत बसवल्यावरून ज्युरींनी टीका केली होती.

त्यानंतर आता अभिनेता नवाझुद्दिन सिद्दिकी यानेही 'इफ्फी'मध्ये अयोग्य लोकांना आमंत्रित करू नका, असे आवाहन केले आहे.

नवाझच्या या आवाहनानंतर पुन्हा चर्चा सुरू झाली आहे. नवाझुद्दिन इफ्फीमध्ये गुरूवारी फिल्म बाजार येथे आला होता. येथे त्याने त्याच्या चित्रपट कारकिर्दीचा प्रवास आणि विविध भूमिकांची तयारी कशी केली, याचा पट उलगडला.

येथे बोलताना बिगर-कलात्मक चित्रपट निर्माते इफ्फीमध्ये हजेरी लावण्यास पात्र आहेत का? असा सवाल केला होता. या प्रश्नाला उत्तर देताना नवाझने, अपात्र लोकांना इफ्फीसाठी आमंत्रित केले जाऊ नये, असे स्पष्टपणे सांगितले.

नवाझ म्हणाला की, “जे लोक कलात्मक चित्रपट बनवतात त्यांना आमंत्रित केले पाहिजे. असे चित्रपट बनवणारे लोक महत्त्वाचे आहेत. आणि त्यांच्यासाठी असे महोत्सव महत्वाचे असतात. ते अशा महोत्सवांना महत्व देतात.

असे अनेक चित्रपट निर्माते आहेत ज्यांना चांगला सिनेमा बनवायचा आहे. आपण त्यांच्याकडे लक्ष दिले पाहिजे.”

काही दिवसांपुर्वी इफ्फीतील भारतीय पॅनोरमा नॉन-फीचर फिल्म ज्युरीचे अध्यक्ष असलेले अरविंद सिन्हा म्हणाले यांनी बॉलीवूड चित्रपट निर्माता-दिग्दर्शक करण जोहर यांच्यासारख्यांना इफ्फीच्या उद्घाटन समारंभात अजिबात प्रवेश देऊ नये.

पुढच्या रांगेतील जागा तर अजिबात देऊ नये, असे म्हटेल होते. ते बॉलीवूड आहे. ते वेगळे आहेत. त्यांचा सिनेमाशी काय संबंध? असा सवाल सिन्हा यांनी केला होता.