Tamnar Project: दक्षिण गोव्‍याला ‘तम्नार’कडून वीज न मिळाल्‍यास उत्तरेतून देणार

Tamnar Project

तम्नार प्रकल्पातून दक्षिण गोव्याला वीज न मिळाल्यास उत्तर गोव्यातून ती देण्याची योजना वीज खात्याने तयार करून त्यावर काम सुरू केले आहे. या प्रकल्पाच्या वीजवाहिन्या जंगल भागातून घालण्यास कर्नाटक सरकारकडून आडकाठी येऊ शकते हे गृहित धरून वीज खात्याने पूर्वीच ही उपाययोजना करून ठेवली होती, अशी माहिती खात्यातील सूत्रांकडून मिळाली आहे.

तम्नार प्रकल्पातून 400 किलो व्होल्ट वीज (एक किलो व्होल्ट म्हणजे एक हजार व्होल्ट) राज्याला उपलब्ध होणार होती. त्यासाठी धारबांदोडा परिसरात एक वीजउपकेंद्र उभारण्यात आले होते. वीज मिळण्याची शाश्वती नसताना हे उपकेंद्र का उभारले अशी टीका विरोधकांकडून सरकारवर करण्यात आली होती.

प्रत्यक्षात सरकारने केंद्रीय वीज प्राधिकरणाच्या माध्यमातून या प्रकल्पासाठी मिळालेल्या निधीतून फोंडा ते धारबांदोडा आणि धारबांदोडा ते शेल्डे या उच्चक्षमतेच्या वीजवाहिन्यांचे नूतनीकरण करूनही घेतले आहे.

सरकारने थिवी वीजउपकेंद्राची क्षमता वाढवली आहे. त्याला पूरक म्हणून साळगाव येथे २२० किलो व्होल्टचे वीजउपकेंद्र उभारण्यात येत आहे. थिवी ते फोंडा उच्चक्षमतेच्या वीजवाहिन्याही घालण्यात येत आहेत. पश्चिम ग्रीडमधून जादा वीज उपलब्ध झाली की ती थिवीपर्यंत आणून नंतर फोंडा, शेल्डेमार्गे दक्षिण गोव्याला पुरवण्याचे वीज खात्याचे नियोजन आहे.

अशी आहे योजना

• पश्‍चिम ग्रीडकडून

• जादा वीज घेणार

• थिवी वीज उपकेंद्र अद्ययावत

• थिवी-फोंडा उच्च

• क्षमतेची वीजवाहिनी

• फोंडा-धारबांदोडा वीजवाहिनी

• धारबांदोडा येथे वीजउपकेंद्र