Goa Accident: इचलकरंजीच्या तरुणाचा गोव्यात अपघाती मृत्यू; कामावरुन घरी जाताना काळाचा घाला

मडगाव: सांकवाळ येथे झालेल्या अपघातात इचलकरंजी, कोल्हापूर येथील २९ वर्षीय तरुणाचा मृत्यू झाला आहे. कामावरुन घरी जात असताना तरुणावर काळाने घाला घातला. तरुण कारमधून घरी जात असताना समोरुन आलेल्या वाहनाच्या प्रकाश झोतामुळे चालकाला अंदाज न आल्याने तो झाडावर आदळला. यातच त्याचा मृत्यू झाला.

अवधूत संजय जाधव (वय २९, रा. इचलकरंजी, कोल्हापूर) असे या अपघातात मृत्यू झालेल्या तरुणाचे नाव आहे. अवधूत कामानिमित्त गोव्यात वास्तव्यास होता. अवधूत जाधव कारमधून कामावरुन घरी जात होता. यावेळी समोरुन आलेल्या वाहनाच्या प्रकाशझोतात त्याला अंदाज न अल्याने त्याची कार झाडावर कोसळली.

जखमी झालेल्या अवधूतला दक्षिण जिल्हा रुग्णालयात उपचारासाठी दाखल करण्यात आले. पण, त्यापूर्वीचा त्याचा मृत्यू झाला होता. त्याच्या पश्चात अडीच वर्षांचा लहान मुलगा, पत्नी, वडील व भाऊ असा परिवार आहे.